စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့သည် ကမ္ဘာ့ဘဏ်(World Bank)နှင့် ကုလသမဂ္ဂဖွံ့ဖြိုးမှုအစီအစဉ် (UNDP) တို့၏ ပံ့ပိုးကူညီမှုဖြင့် ပူးပေါင်းဆောင်ရွက်ခဲ့ သည့် မြန်မာနေထိုင်မှုအခြေအနေစစ်တမ်း (၂၀၁၇)(Myanmar Living Conditions Survey - MLCS)မှ ကောက်ယူရရှိလာသည့် အချက်အလက်များဖြင့်“Key Indicators Report” ထုတ်ပြန်နိုင်ရနအတွက် အလုပ်ရုံဆွေးနွေးပွဲကို ၂၀၁၈ခုနှစ်၊ ဧပြီလ(၁၁)ရက်၊ ဗုဒ္ဓဟူးနေ့နံနက် (၀၉း၃၀)နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ရုံးအမှတ်(၃၂) အစည်းအဝေးခန်းမတွင်ကျင်းပပြုလုပ်ခဲ့ပါသည်။

          အလုပ်ရုံဆွေးနွေးပွဲသို့ဗဟိုစာရင်းအင်းအဖွဲ့မှ ညွှန်ကြားရေးမှူးချုပ်၊ ဒုတိယညွှန်ကြား ရေးမှူးချုပ်၊ သက်ဆိုင်ရာဦးစီးဌာနများမှ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ အရာထမ်း/အမှုထမ်းများ၊ဖွံ့ဖြိုးမှုမိတ်ဖက်အဖွဲ့အစည်းများ၊ ပြင်ပသုတေသနအဖွဲ့အစည်းများ၊ Cluster အဖွဲ့ခေါင်းဆောင်များ၊ တာဝန်ရှိသူများအပါအဝင်စုစုပေါင်း(၁၅၀)ဦးခန့် တက်ရောက်ခဲ့ ကြပါသည်။

          ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်၊ ဒေါက်တာဝါဝါမောင်မှ အဖွင့်အမှာစကား ပြောကြားရာတွင် မြန်မာနေထိုင်မှုအခြေအနေစစ်တမ်း (၂၀၁၇)မှ အဓိကညွှန်ကိန်းများ အစီရင် ခံစာထုတ်ဝေရေးနှင့် ပတ်သက်သည့် အလုပ်ရုံဆွေးနွေးပွဲသို့ ကြွရောက်လာကြသူများအား ကြိုဆိုပါကြောင်း၊ ၁၂ လတာကာလပတ်လုံး Quarter (၄) ခုခွဲ၍ ကောက်ယူခဲ့သော မြန်မာ နေထိုင်မှုအခြေအနေစစ်တမ်းမှာ ၂၀၁၇ ခုနှစ်၊ ဒီဇင်ဘာလတွင်ပြီးဆုံးခဲ့ပြီဖြစ်ပါကြောင်း၊ အဓိက ညွှန်ကိန်းများအစီရင်ခံစာနှင့်ပတ်သက်၍ ပထမဦးဆုံး အစီရင်ခံစာထုတ်ဝေနိုင်ရန်အတွက် ညှိနှိုင်းအကြံဉာဏ်တောင်းခံရန် ယနေ့အလုပ်ရုံဆွေးနွေးပွဲအား ကျင်းပရခြင်း ဖြစ်ပါကြောင်း၊ ယခင်အစောပိုင်းကာလများတွင် ကိန်းဂဏန်းအသုံးပြုသူများနှင့် ဆွေးနွေးခဲ့သည့် အလုပ်ရုံ ဆွေးနွေးပွဲများ၌ ကြေညာခဲ့သည့်အတိုင်း ၂၀၁၈ခုနှစ်၊ မတ်လအကုန် (သို့မဟုတ်) ဧပြီလ အစောပိုင်းတွင်အဓိကညွှန်ကိန်းများအစီရင်ခံစာကိုထုတ်ဝေနိုင်မည်ဟုရည်မှန်းချက်ထားဆောင်ရွက်ခဲ့ပါကြောင်း၊ အဓိကညွှန်ကိန်းများအစီရင်ခံစာတွင် မြန်မာနေထိုင်မှုအခြေအနေစစ်တမ်းမှ တွေ့ရှိမှုအခြေအနေများ၊ ၂၀၁၇ခုနှစ်တွင်မြန်မာနိုင်ငံရှိတိုင်းဒေသကြီးနှင့် ပြည်နယ်များအတွင်း အချိန်နှင့်အမျှ ပြောင်းလဲနေသောနေထိုင်မှုပုံစံများအား အဓိကထားဖော်ပြထားပါကြောင်း၊ အစီရင်ခံစာတွင် အခြားသောစစ်တမ်းများ၏ ရလဒ်များနှင့် နှိုင်းယှဉ်၍ဖော်ပြထားပါကြောင်း၊ အမျိုးသားစာရင်းအင်းစနစ်ကို လွှမ်းခြုံနိုင်ရန် ရည်ရွယ်ထားပြီး ညွှန်ကိန်းများအား ရှင်းလင်း သောအဓိပ္ပါယ်နှင့် Methodologyများဖြင့်ဖော်ပြသွားမည် ဖြစ်ပါကြောင်း၊ ညွှန်ကိန်းများ၏ လားရာနှင့် ညီညွတ်ကိုက်ညီမှုတို့ကိုလည်း စိစစ်ထားပါကြောင်း၊ နေထိုင်မှုအခြေအနေ ပုံစံများ အားအရေအတွက်သာမက အရည်အသွေးရှုထောင့်အားဖြင့်လည်း ကြည့်ရှုရမည်‌ဖြစ်ပါကြောင်း၊ သို့ဖြစ်ပါ၍ သာယာဝပြောမှုကိုတိုင်းတာသည့် ငွေကြေးမဟုတ် သည့်ညွှန်ကိန်းများလည်း ပါဝင် ပါကြောင်း၊ အဓိကညွှန်ကိန်းများအစီရင်ခံစာ ထုတ်ပြန်ပြီးပါကမညီမျှမှုများ၊ ဆင်းရဲနွမ်းပါးမှု များကို ဖော်ပြထားသည့် ဆင်းရဲနွမ်းပါးမှု အစီရင်ခံစာအားလည်းကောင်း၊ လူမှု/စီးပွားအခြေ အနေအစီရင်ခံစာအားလည်းကောင်း၊ ၂၀၁၈ ခုနှစ်မကုန်မီဆက်လက်ထုတ်ပြန်သွားမည် ဖြစ်ပါ ကြောင်း၊ အစီရင်ခံစာနှင့်စပ်လျဉ်း၍ တက်ရောက်လာကြသူများ၏အကြံပြုချက်များ၊ ဆွေးနွေး ပြောကြားချက်များကိုရရှိနိုင်မည်ဟု မျှော်လင့်ပါကြောင်း၊ အကြံပြုဆွေးနွေးချက်များကို အစီရင် ခံစာတွင် ထည့်သွင်းစဉ်းစားသွားမည်ဖြစ်ပြီး ၂၀၁၈ ခုနှစ် မေလတွင် ထုတ်ပြန်သွားမည် ဖြစ်ပါကြောင်း၊ ဗဟိုစာရင်းအင်းအဖွဲ့အနေဖြင့် E-mails များမှတဆင့်ပေးပို့လာသည့် ခိုင်လုံသည့် အကြံပြုချက်များအားလည်း ထည့်သွင်းစဉ်းစားသွားမည်ဖြစ်ပါကြောင်း ပြောကြားခဲ့ ပါသည်။

          ဆက်လက်၍ ဗဟိုစာရင်းအင်းအဖွဲ့၊ လက်ထောက်ညွှန်ကြားရေးမှူး၊ ဒေါ်ခင်ဆက်ရည်၊ World Bank မှ Senior Economist - Dr. Reena Badiani-Magnussonနှင့် UNDP မှ Project Analyst - ဦးစည်သူထိုက်စံတို့မှ အစီရင်ခံစာနှင့် ပတ်သက်၍ ရှင်းလင်းပြောကြား ကာတက်ရောက်လာကြသူများမှ မေးမြန်းဆွေးနွေးခဲ့ကြပြီး၊ ညွှန်ကြားရေးမှူးချုပ်မှ နိဂုံးချုပ် အမှာစကားပြောကြားကာအလုပ်ရုံဆွေးနွေးပွဲကိုနေ့လည် (12:30)နာရီတွင် ရုပ်သိမ်းခဲ့ပါသည်။

(သတင်းစဉ်)

နေပြည်တော်၊ ဧပြီလ (၁၁)  ရက်