Myanmar Global Investment Forum2017ကျင်းပ

Myanmar Global Investment Forum -2017 ကို စက်တင်ဘာလ ၁၂ရက်နေ့ နံနက် ၉ နာရီတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်း ဗဟိုဌာန -၂ ၌ ကျင်းပရာ ပြည်ထောင်စုဝန်ကြီး ဦးသန့်စင်မောင်နှင့် ဦးခင်မောင်ချို၊ ဒုတိယဝန်ကြီး ဦးမောင်မောင်ဝင်း၊ မြန်မာနိုင်ငံတော် ဗဟိုဘဏ် ဒုတိယဥက္ကဋ္ဌ ဦးစိုးသိန်း၊ လွှတ်တော်ကိုယ်စားလှယ်များ၊ ညွှန်ကြားရေးမှူးချုပ်များ၊ မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ် ကိုယ်စားလှယ်များ၊ Euromoney Institutional Investor (Asia), Chief Executive Officer, Mr. Tony Shale ဦးဆောင်သည့် ကိုယ်စားလှယ်များ၊ ပြည်တွင်း၊ ပြည်ပ စီးပွားရေးလုပ်ငန်းရှင်များ၊ ပြည်တွင်း၊ ပြည်ပ မီဒီယာများနှင့် တာဝန်ရှိသူများ တက်ရောက် ကြသည်။
ဖိုရမ်တွင် စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းနှင့် Euromoney Institutional Investor (Asia), Chief Executive Officer, Mr. Tony Shale တို့က ကြိုဆိုနှုတ်ခွန်းဆက် စကား ပြောကြားကြသည်။ ထို့နောက် Nikkei Asian Review, Chief Editor, Gwen Robinson၊ Jardine Matheson, Myanmar and Cambodia, Country Chairman Peter Beynon၊ YGA Capital, Managing Director Thura Ko Ko၊ International Finance Corporation, Country Manager Vikram Kumar ၊ စီမံကိန်းနှင့် ဘဏ္ဍာရေး ဝန်ကြီးဌာန ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်နှင့် Yoma Strategic, Chief Executive Officer and Executive Director Melvyn Pun တို့ ဦးဆောင်ကာ Myanmar Global Investment Forum -2017 နှင့်စပ်လျဉ်း၍ ဆွေးနွေး ကြသည်။
ဖိုရမ်တွင် မြန်မာနိုင်ငံ၏ စီးပွားရေးအခြေအနေ ရှုမြင်သုံးသပ်ချက်များ၊ ရင်းနှီးမြှုပ်နှံမှု အခြေအနေများ၊ ဘဏ်လုပ်ငန်းနှင့် ဘဏ္ဍာရေးဆိုင်ရာ ပြုပြင်ပြောင်းလဲမှုများ၊ လျှပ်စစ်နှင့် စွမ်းအင်ကဏ္ဍ ပေါင်းစပ်မှု အခြေအနေများ၊ အခြေခံအဆောက်အအုံများနှင့် စပ်လျဉ်းသည့် စိန်ခေါ်မှုများ၊ စက်မှုကဏ္ဍ ဖွံ့ဖြိုးတိုးတက်မှု အခြေအနေများ၊ စိုက်ပျိုးမွေးမြူရေးကဏ္ဍ တိုးတက်မှု အခြေအနေများနှင့် ခရီးသွားကဏ္ဍတိုးတက်လာစေရေး ဆောင်ရွက်မှု အခြေအနေ များကို ဆွေးနွေးကြသည်။ ဖိုရမ်ကို စက်တင်ဘာ ၁၃ ရက်ထိ ကျင်းပမည်ဖြစ်ကြောင်း သိရသည်။

နေပြည်တော် စက်တင်ဘာ ၁၂