နိုင်ငံအဆင့်ဆန္ဒအလျောက်ပြန်လည်သုံးသပ်မှု (VNR) အစီရင်ခံစာပြုစုရေးနှင့်စပ်လျဉ်း၍ တိုင်းဒေသကြီး/ပြည်နယ်အဖွဲ့အစည်းများ၊ အရပ်ဘက်လူမှုအဖွဲ့အစည်းများနှင့် ညှိနှိုင်းအစည်းအဝေးကျင်းပ

စီမံကိန်းနှင့်ဘဏ္ဍာရေးဝန်ကြီးဌာနက ကြီးမှူး၍ နိုင်ငံအဆင့်ဆန္ဒအလျောက် ပြန်လည် သုံးသပ်မှု (Voluntary National Review-VNR) အစီရင်ခံစာပြုစုရေးနှင့် စပ်လျဉ်း၍ တိုင်းဒေသ ကြီး/ပြည်နယ်အဖွဲ့အစည်းများ၊ အရပ်ဘက်လူမှုအဖွဲ့အစည်းများနှင့် ညှိနှိုင်းအစည်းအဝေးကို ယနေ့ နံနက် ၁၀:၀၀ နာရီတွင် Virtual ပုံစံဖြင့် ကျင်းပခဲ့သည်။

အစည်းအဝေးသို့ နိုင်ငံအဆင့်ဆန္ဒအလျောက်ပြန်လည်သုံးသပ်မှု (Voluntary National Review-VNR) အစီရင်ခံစာ တင်သွင်းရေးအတွက် ပူးပေါင်းဆောင်ရွက်ရေးကော်မတီ ဥက္ကဋ္ဌ၊ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း နှင့် တိုင်းဒေသကြီးနှင့် ပြည်နယ်များမှ စီမံအုပ်ချုပ်ရေးကောင်စီအဖွဲ့ဝင်များ၊ ဌာနဆိုင်ရာများမှ တာဝန်ရှိပုဂ္ဂိုလ်များ၊ အရပ်ဘက်လူမှုအဖွဲ့အစည်းများမှ ကိုယ်စားလှယ်များ၊ စီမံကိန်းရေးဆွဲရေးစီးဌာနမှ တာဝန်ရှိ ပုဂ္ဂိုလ်များ တက်ရောက်ခဲ့ကြသည်။

အစည်းအဝေးတွင် ဒုတိယဝန်ကြီးက ၂၀၂၁ ခုနှစ်၊ ဇူလိုင်လတွင်ကျင်းပပြုလုပ်မည့် 21st High Level Political Forum(HLPF) အစည်းအဝေးတွင် မြန်မာနိုင်ငံက နိုင်ငံအဆင့်ဆန္ဒ အလျောက် ပြန်လည်သုံးသပ်မှုအစီရင်ခံစာ(VNR) ကို တင်သွင်းမည်ဖြစ်ကြောင်း၊ အစီရင်ခံစာ တင်သွင်းမှုနှင့်ပတ်သက်၍ ပေါင်းစပ်ညှိနှိုင်းရေးကော်မတီ၊ အစီရင်ခံစာ ရေးသားပြုစုရေး လုပ်ငန်းအဖွဲ့နှင့် Core Group တို့ကို ဖွဲ့စည်းဆောင်ရွက်နေကြောင်း၊ Sustainable Development Goals-SDGs ပြည့်မီရေးအတွက် နိုင်ငံအသီးသီးက အကောင်အထည်ဖော်လျက် ရှိပြီး နိုင်ငံများက မိမိတို့ဆန္ဒအလျောက် အစီရင်ခံစာ (VNR) ကို တင်သွင်းခြင်းဖြစ်ကြောင်း၊ မြန်မာနိုင်ငံအနေဖြင့် ဇူလိုင်လတွင် ပြုလုပ်မည့် 21st HLPF တွင် အစီရင်ခံစာပြုစုတင်သွင်းရန် ပြင်ဆင်လျက်ရှိကြောင်း၊ အစီရင်ခံစာ ရေးသားမှုတွင် တိုင်းဒေသကြီး/ပြည်နယ်များရှိ အစိုးရ ဌာနများ နှင့် အရပ်ဘက် လူမှုအဖွဲ့အစည်းများ၊ လုပ်ငန်းရှင်များ၏ အကြံပြုချက်များသည်လည်း အရေးကြီးကြောင်း၊ တက်ရောက်လာကြသည့် ကိုယ်စားလှယ်များအနေဖြင့် အစီရင်ခံစာနှင့ ်စပ်လျဉ်း၍ ထည့်သွင်းလိုသည့် အချက်အလက်များကို ဆွေးနွေး အကြံပြုပေးစေ လိုကြောင်းဖြင့် ပြောကြားခဲ့သည်။

ဆက်လက်၍ စီမံကိန်းရေးဆွဲရေးဦးစီးဌာန၊ ညွှန်ကြားရေးမှူးချုပ်က VNR အစီရင်ခံစာ ရေးသားမှု လုပ်ငန်းစဉ်များနှင့်အစီရင်ခံစာပါ အကြောင်းအရာများနှင့်ပတ်သက်၍ ရှင်းလင်း ဆွေးနွေးခဲ့ပြီး တိုင်းဒေသကြီး/ပြည်နယ်များမှ ဌာနဆိုင်ရာ တာဝန်ရှိပုဂ္ဂိုလ်များ၊ အရပ်ဘက် လူမှုအဖွဲ့အစည်းများမှ တာဝန်ရှိပုဂ္ဂိုလ်များက အကြံပြုဆွေးနွေးခဲ့ကြောင်း သတင်းရရှိသည်။

နေပြည်တော်၊ မေ ၂၇ ရက်