COVID-19 ကာကွယ်ဆေးဝယ်ယူရရှိရေးရန်ပုံငွေ စီမံခန့်ခွဲမှုဆပ်ကော်မတီ၊ ဥက္ကဌ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန် COVID-19 ကာကွယ်ဆေးဝယ်ယူရရှိရေးရန်ပုံငွေစာရင်းသို့ လှူဒါန်းသည့် အခမ်းအနားသို့ တက်ရောက်

COVID-19 ကာကွယ်ဆေး ဝယ်ယူရရှိရေးရန်ပုံငွေစာရင်းသို့ လှူဒါန်းသည့်အခမ်းအနားကို ၂၀၂၁ ခုနှစ် ဧပြီလ (၂၇) ရက်နေ့ နံနက် (၁၀:၀၀) နာရီတွင် နေပြည်တော်ရှိ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ရုံးအမှတ် (၃၄) ၌ ကျင်းပပြုလုပ်ရာ အခမ်းအနားသို့ COVID-19 ကာကွယ်ဆေး ဝယ်ယူရရှိရေးရန်ပုံငွေ စီမံခန့်ခွဲမှုဆပ်ကော်မတီ ဥက္ကဋ္ဌ၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်၊ အဖွဲ့ဝင်များ နှင့် ဒုတိယဝန်ကြီးများ၊ ဌာနဆိုင်ရာ အကြီးအကဲများနှင့် ကျပ်သိန်း ၁,၀၀၀ နှင့်အထက် အလှူရှင် (၅) ဦး၊ ကျပ်သိန်း ၁၀၀ အလှူရှင် (၂) ဦးတို့ တက်ရောက်ခဲ့ကြပါသည်။

အခမ်းအနားတွင် အလှူရှင်တစ်ဦးက လှူဒါန်းရသည့် ရည်ရွယ်ချက်ကို ရှင်းလင်း ပြောကြားခဲ့ပြီး COVID-19 ကာကွယ်ဆေးဝယ်ယူရရှိရေးရန်ပုံငွေ စီမံခန့်ခွဲမှု ဆပ်ကော်မတီ  ဥက္ကဋ္ဌ၊ စီမံကိန်း၊ ဘဏ္ဍာရေးနှင့်စက်မှုဝန်ကြီးဌာန ၊ ပြည်ထောင်စုဝန်ကြီး ဦးဝင်းရှိန်က ကျေးဇူးတင်စကား ပြန်လည်ပြောကြားခဲ့ပါသည်။

ပြည်ထောင်စုဝန်ကြီး ဦးဝင်းရှိန်က COVID-19 ကာကွယ်ဆေး ဝယ်ယူရရှိနိုင်ရေးအတွက် COVID-19 ကာကွယ်ဆေးဝယ်ယူ ရရှိရေးရန်ပုံငွေ စီမံခန့်ခွဲမှုဆပ်ကော်မတီကို (၃၀-၁၂-၂၀၂၀) ရက်နေ့တွင် ဖွဲ့စည်းတည်ထောင်ခဲ့ပြီး COVID-19 ကာကွယ်ဆေး ဝယ်ယူရရှိရေး ရန်ပုံငွေ (COVID-19 Vaccination Fund) ကို မြန်မာ့စီးပွား​ရေးဘဏ် (နေပြည်တော်)၌ မြန်မာကျပ်ငွေစာရင်းနှင့် နိုင်ငံခြားငွေစာရင်း ဖွင့်လှစ်ခဲ့ပါကြောင်း၊ ရန်ပုံငွေ ထူထောင် ရသည့် ရည်ရွယ်ချက်မှာ ပြည်သူအားလုံးအတွက် COVID-19 ကာကွယ်ဆေးများကို လျင်မြန်စွာနှင့် လုံလောက်စွာဝယ်ယူရရှိပြီး ထိရောက်စွာအသုံးပြုနိုင်ရန် ဖြစ်ပါကြောင်း၊

နိုင်ငံတော်မှ မတည်ရန်ပုံငွေအဖြစ် ကျပ်သန်း ၁,၀၀၀ နှင့် အမေရိကန်ဒေါ်လာ သန်း ၂၅၀ ထည့်ဝင် ခဲ့ပါကြောင်း၊ ရန်ပုံငွေအား စနစ်တကျသုံးစွဲနိုင်ရေးနှင့် စာရင်းများ စနစ်တကျ ထိန်းသိမ်း ထားရှိနိုင်ရေးအတွက် COVID-19 ကာကွယ်ဆေး ဝယ်ယူရရှိရေးရန်ပုံငွေဆိုင်ရာ ဘဏ္ဍာရေးလုပ်ထုံးလုပ်နည်း ရေးဆွဲသတ်မှတ်ပြီး အဆိုပါလုပ်ထုံးလုပ်နည်းနှင့်အညီ ဆောင်ရွက် လျက်ရှိပါကြောင်း၊ ရန်ပုံငွေသို့ ပြည်တွင်း/ပြည်ပအလှူရှင်များက လွယ်လင့်တကူ လှူဒါန်းနိုင်ရေး အတွက်လည်း လှူဒါန်းနိုင်သည့် နည်းလမ်းများကိုလည်း စီစဉ်ထားပါကြောင်း၊ အလှူငွေများကို နိုင်ငံပိုင်ဘဏ်နှင့် ပုဂ္ဂလိကဘဏ်များ၏ ဘဏ်ခွဲများအားလုံးတွင် ငွေသားဖြင့်လည်းကောင်း၊ စာရင်းပြောင်းနည်းလမ်းဖြင့်လည်းကောင်း၊ Mobile Application မှတစ်ဆင့် လည်းကောင်း၊ MPU Card မှတစ်ဆင့်လည်းကောင်း၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၏ Website မှတစ်ဆင့်လည်းကောင်း လှူဒါန်းနိုင်ပါကြောင်းတို့ကို (၁၀−၁−၂၀၂၁) ရက်နေ့ နှင့် (၁၈−၁−၂၀၂၁) ရက်နေ့ထုတ် နိုင်ငံပိုင်သတင်းစာများတွင် ကြေညာထားပါကြောင်း၊ ရန်ပုံငွေသို့လှူဒါန်းသည့် အလှူရှင်များစာရင်း၊ မြန်မာကျပ်ငွေစာရင်းနှင့် နိုင်ငံခြားငွေ စာရင်း လက်ကျန်ငွေများကို  မြန်မာ့အသံနှင့်ရုပ်မြင်သံကြားနှင့် နိုင်ငံပိုင်သတင်းစာများ တွင် အပတ်စဉ်သတင်း ထုတ်ပြန်ကြေညာပေးလျက်ရှိပါကြောင်း၊ ရန်ပုံငွေစာရင်း စတင်ဖွင့် လှစ်သည့် (၆−၁−၂၀၂၁) ရက်နေ့မှ (၂၃−၄−၂၀၂၁) ရက်နေ့အထိ အလှူရှင်များမှ စုစုပေါင်းလှူဒါန်းငွေကျပ် ၂၉,၇၈၄,၂၅၀,၁၁၅.၃၉ နှင့် အမေရိကန်ဒေါ်လာ ၃,၁၄၀,၁၄၉.၅၃ ရှိ သဖြင့် နိုင်ငံတော်မှထည့်ဝင်ငွေအပါအဝင် ရန်ပုံငွေစုစုပေါင်းမှာ ကျပ် ၃၀,၇၈၄,၂၅၀,၁၁၅.၃၉ နှင့် အမေရိကန်ဒေါ်လာ ၂၅၃,၁၄၀,၁၄၉.၅၃ ရှိပါကြောင်း၊ အိန္ဒိယနိုင်ငံ Serum Institute of India (SII) Pvt. Ltd. မှထုတ်လုပ်သည့် COVID-19 ကာကွယ်ဆေးဖြစ်သည့် (Covishield) အကြိမ်​ရေ သန်း(၃၀) ဝယ်ယူနိုင်ရေးအတွက် ပထမအကြိမ်အဖြစ် ၂၀၂၁ ခုနှစ်၊ ဇန်နဝါရီလ ၇ ရက်နေ့တွင် COVID-19 ကာကွယ်ဆေးဝယ်ယူရရှိရေးရန်ပုံငွေမှ အမေရိကန်ဒေါ်လာ (၇၅) သန်းကို ငွေပေးချေပြီးဖြစ်သဖြင့် နိုင်ငံခြားငွေစာရင်းတွင် အမေရိကန်ဒေါ်လာ ၁၇၈,၁၄၀,၁၄၉.၅၃ ကျန်ရှိပါကြောင်း၊ ၆-၁-၂၀၂၁ ရက်နေ့မှ ၂၃-၄-၂၀၂၁ ရက်နေ့အထိ လှူဒါန်းမှုများအနက် ကျပ်သိန်းတစ်ထောင်နှင့်အထက် အလှူရှင် (၅၆)ဦး၊  ကျပ်သိန်းငါးရာနှင့်အထက်မှ သိန်း တစ်ထောင်အောက် အလှူရှင် (၄၀) ဦး၊  ကျပ်သိန်းတစ်ရာနှင့်အထက်  ကျပ်သိန်းငါးရာအောက်အလှူရှင် (၃၂၅) ဦး၊ ကျပ်တစ်သိန်းနှင့်အထက်မှ ကျပ်သိန်းတစ်ရာအောက် အလှူရှင် (၆,၇၁၆) ဦးနှင့် ကျပ် တစ်သိန်းအောက် အလှူရှင် (၂,၉၅၆) ဦး၊ စုစုပေါင်းအလှူရှင် (၁၀,၀၉၃) ဦး ရှိပါ ကြောင်း၊ လှူဒါန်းငွေ ကျပ်တစ်သိန်းနှင့်အထက်အား အလှူရှင်များ၏ဆန္ဒအရ ဂုဏ်ပြု မှတ်တမ်းလွှာများကို ပေးအပ်လျက်ရှိပါကြောင်း၊ ပထမအကြိမ် အလှူငွေပေးအပ်ပွဲ အခမ်းအနားကို (၂၂−၁−၂၀၂၁) ရက်နေ့တွင် ပြုလုပ်ခဲ့ပြီး ကျပ်သိန်းတစ်ရာနှင့်အထက် အလှူရှင် (၈) ဦးအား ဂုဏ်ပြုမှတ်တမ်းလွှာများ ပေးအပ်ခဲ့ပြီးဖြစ်ပါကြောင်း၊ ဂုဏ်ပြုမှတ် တမ်းလွှာများ ထုတ်ယူရာတွင် အဆင်ပြေစေရန် ရန်ကုန်တိုင်းဒေသကြီး၊ မြန်မာ့လယ်ယာ ဖွံ့ဖြိုးရေးဘဏ်ရုံးချုပ်တွင်လည်းကောင်း၊  မန္တလေးတိုင်းဒေသကြီး၊ ပြည်တွင်းအခွန်များဦးစီး ဌာနမှူးရုံးတွင်လည်းကောင်း၊ ထုတ်ပေးရန် စီစဉ်ထားရှိပါကြောင်း၊ လှူဒါန်းငွေများကို ရေးဆွဲသတ်မှတ်ထားသည့် COVID-19 ကာကွယ်ဆေးဝယ်ယူရရှိရေး ရန်ပုံငွေဆိုင်ရာ ဘဏ္ဍာရေးလုပ်ထုံးလုပ်နည်းများနှင့်အညီ စနစ်တကျ ဘဏ်စာရင်းတွင်ထားရှိ၍ ကာကွယ်ဆေး ဝယ်ယူရရှိရေးဆိုင်ရာ အသုံးစရိတ်များကိုသာ ပေးချေသုံးစွဲလျက်ရှိပြီး စာရင်းစစ်ဆေးမှုကိုလည်း ခံယူသွားမှာဖြစ်ပါကြောင်း၊ COVID-19 ကာကွယ်ဆေး ဝယ်ယူရရှိရန် အဓိကလိုအပ်သည့် ဘဏ္ဍာငွေများကို ဝိုင်းဝန်းပါဝင်လှူဒါန်းကြပါသော ပြည်တွင်း/ပြည်ပ အနယ်နယ်အရပ်ရပ်မှ အလှူရှင်များအားလုံးကို COVID-19 ကာကွယ်ဆေး ဝယ်ယူရရှိရေးရန်ပုံငွေ စီမံခန့်ခွဲမှု ဆပ်ကော်မတီမှ အထူးပင် ကျေးဇူးတင်ရှိပါကြောင်း​နှင့် COVID-19 ကာကွယ်ထိန်းချုပ် ကုသရေးဗဟိုကော်မတီကိုယ်စား ဂုဏ်ပြုမှတ်တမ်းတင် ပါကြောင်း ပြောကြားခဲ့ပါသည်။

ဆက်လက်၍ အလှူရှင်များက COVID-19 ကာကွယ်ဆေးဝယ်ယူရရှိရေးရန်ပုံငွေသို့ အလှူငွေပေးအပ်ခြင်းနှင့် အလှူရှင်များအား ဂုဏ်ပြုမှတ်တမ်းလွှာများ ပေးအပ်ခြင်းတို့ ဆောင်ရွက်ခဲ့ကြောင်း သတင်းရရှိပါသည်။

သတင်းစဉ်