စီမံကိန်းနှင့်ဘဏ္ဍာရေးဝန်ကြီးဌာန၊ဗဟိုစာရင်းအင်းအဖွဲ့(CSO)၊ မြန်မာဖွံ့ဖြိုးမှုအဖွဲ့ အစည်း(MDI)နှင့် ဖက်ဒရယ်ဂျာမနီ သမ္မတနိုင်ငံအစိုးရ၊ Deutsche Gesellschaft fur Internationale Zusammenarbeit (GIZ) တို့အတူပူးပေါင်း၍ နည်းပညာပူးပေါင်းဆောင်ရွက် ရေး စီမံချက်အတွက် အကောင်အထည်ဖော်ဆောင်ရေး သဘောတူညီချက် လက်မှတ်ရေးထိုးပွဲ အခမ်းအနားကို ၂၀၁၉ ခုနှစ်၊ ဇန်နဝါရီလ (၂၂) ရက်နေ့၊ နံနက် (၁၀:၀၀) နာရီတွင် စီမံကိန်း နှင့်ဘဏ္ဍာရေးဝန်ကြီးဌာန၊ ရုံးအမှတ် (၃၂) အစည်းအဝေးခန်းမ၌ ကျင်းပပြုလုပ်ခဲ့ပါသည်။

အဆိုပါစီမံချက်သည်မြန်မာနိုင်ငံ အမျိုးသားစာရင်းအင်းစနစ် (Myanmar National Statistical System-NSS) ကို ခိုင်မာအားကောင်းလာစေရန် စာရင်းအင်းဆိုင်ရာဝန်ဆောင်မှု ပေးသည့် ဗဟိုစာရင်းအင်းအဖွဲ့၏ စွမ်းဆောင်ရည်များကို တိုးမြှင့်ပေးခြင်း၊ ၂၀၃၀ ပြည့်နှစ် အစီအစဉ်ကို အကောင်အထည်ဖော်ဆောင်ရွက်ရန်အတွက် နိုင်ငံတော်၏ ဦးစားပေးကဏ္ဍများတွင် ပါဝင်ပတ်သက်နေသူများမှ သက်ဆိုင်ရာအချက်အလက်များကို အရည်အသွေးနှင့် စံချိန်စံညွှန်း ပြည့်ဝစွာ ကောက်ယူစုစည်းနိုင်ခြင်းနှင့် မြန်မာနိုင်ငံတွင် ၂၀၃၀ ပြည့်နှစ်အစီအစဉ် အကောင် အထည်ဖော်ဆောင်မှုအတွက် အထောက်အထား အခြေပြုမူဝါဒဆိုင်ရာ ထောက်ခံအကြံပြုချက်များ ပံ့ပိုးပေးခြင်း အစရှိသည့် လုပ်ငန်းနယ်ပယ်တို့တွင် ဆောင်ရွက်သွားမည်ဖြစ်ပါသည်။ (သတင်းစဉ်)

နေပြည်တော်၊ ဇန်နဝါရီ(၂၂)ရက်