ကရင်ပြည်နယ်၌ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲကျင်းပ

ကရင်ပြည်နယ်၊ ဗဟိုစာရင်းအင်းအဖွဲ့၏ စာရင်းအင်းဥပဒေ၊ နည်းဥပဒေများ အသိပညာမြှင့်တင်ရေးဆွေးနွေးပွဲကို ၁၆-၂-၂၀၂၂ ရက်နေ့ နံနက် (၁၀:၀၀) နာရီတွင် ကရင်ပြည်နယ်၊ ဘားအံမြို့၊ ဇွဲကပင်ခန်းမ၌ ကျင်းပခဲ့ပါသည်။ ဆွေးနွေးပွဲသို့ ကရင်ပြည်နယ်အစိုးရအဖွဲ့၊ ပြည်နယ် ဝန်ကြီးချုပ်ဦးစောမြင့်ဦးမှ တက်ရောက်၍ အဖွင့်အမှာစကား ပြောကြားခဲ့ပါသည်။ ဆွေးနွေးပွဲသို့ ကရင်ပြည်နယ်အစိုးရအဖွဲ့ဝင် ဝန်ကြီးများ၊ ဗဟိုစာရင်းအင်းအဖွဲ့မှ ဒုတိယညွှန်ကြားရေးမှူးချုပ်နှင့်တာဝန်ရှိသူများ၊ ဖိတ်ကြားထားသော ဌာနဆိုင်ရာများမှ ဌာနအကြီးအကဲများ တက်ရောက် ခဲ့ကြပါသည်။
ကရင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ်ဦးစောမြင့်ဦးမှ အဖွင့်အမှာစကား ပြောကြားရာတွင်  စာရင်းအင်းဥပဒေနှင့်နည်းဥပဒေများ သက်ဝင်ကျင့်သုံးလာစေရေး၊ အမျိုးသား စာရင်းအင်းစနစ်တွင် ပါဝင်ပတ်သက်သည့် သက်ဆိုင်ရာဌာနများနှင့် ပုဂ္ဂလိကလုပ်ငန်းရှင်များ အကြား စာရင်းအင်းဥပဒေနှင့်နည်းဥပဒေများနှင့်စပ်လျဉ်း၍ ကျယ်ကျယ်ပြန့်ပြန့် သိရှိနားလည်စေရေးနှင့် စာရင်းအင်းလုပ်ငန်းစဉ်များကို ဆောင်ရွက်ရာတွင် ဥပဒေနှင့်အညီဆောင်ရွက်နိုင်စေရေးအတွက် စာရင်းအင်းဥပဒေနှင့်နည်းဥပဒေ အသိပညာမြှင့်တင်ရေး ဆွေးနွေးပွဲကို ကျင်းပရခြင်းဖြစ်ပါကြောင်း၊ စာရင်းအင်းအချက်အလက်မှန်ကန်ရေးသည် ဖွံ့ဖြိုးပြီးနိုင်ငံများအတွက်သာမက ဖွံ့ဖြိုးဆဲနိုင်ငံများအတွက်လည်း အလွန်အရေးကြီးပါကြောင်း၊ နိုင်ငံတစ်နိုင်ငံ ဖွံ့ဖြိုးတိုးတက်ရန်အတွက် အမျိုးသားစာရင်းအင်းစနစ်ခိုင်မာမှုရှိရန် လိုအပ်ပါကြောင်း၊ တိကျမှန်ကန်ပြီး အရည်အသွေးပြည့်ဝသည့် စာရင်းအင်းအချက်အလက်များ ရရှိမှသာ မူဝါဒချမှတ်သူများ၊ စီမံကိန်းရေးဆွဲသူများ၊ ပုဂ္ဂလိကလုပ်ငန်းရှင်များ၊ လူမှု-စီးပွားသုတေသန ဆောင်ရွက်သူများ အားလုံးအတွက် ပြည့်စုံကောင်းမွန်သည့်မူဝါဒများ၊ စီမံကိန်းများ၊ စီးပွားရေးဝန်းကျင်ကောင်းများကို ဖန်တီးပေးနိုင်မှာဖြစ်ပါကြောင်း၊
ကရင်ပြည်နယ်၊ ဗဟိုစာရင်းအင်းအဖွဲ့အနေဖြင့် ဈေးနှုန်းစာရင်းအင်းကောက်ယူခြင်း၊ ကျန်းမာရေးဦးစီးဌာနမှပေးပို့သော မွေးဖွားမှုပုံစံ(၁၀၁)နှင့် သေဆုံးမှုပုံစံ (၂၀၁) တို့ကို E-platform မှ ရေးသွင်းကာ ဗဟိုစာရင်းအင်းအဖွဲ့၏ Server သို့ နေ့စဉ်ပေးပို့ခြင်း၊ လူမှု-စီးပွားဆိုင်ရာ အညွှန်းကိန်းများကိုလည်း ဌာနဆိုင်ရာများမှ စုစည်းတင်ပြခြင်း၊ ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှုလျှော့ချရေးဆိုင်ရာ အညွှန်းကိန်းများကိုလည်း စုစည်းတင်ပြခြင်း၊ ကလေးလုပ်သားပပျောက်ရေးစစ်တမ်းကို   (၂၀၁၉-၂၀၂၀) ခုနှစ်တွင် ကောက်ယူခဲ့ပြီး (၂၀၂၂-၂၀၂၃) ဘဏ္ဍာရေးနှစ်တွင်လည်း ထပ်မံကောက်ယူမည်ဖြစ်ပါကြောင်းနှင့် အခါအားလျော်စွာ စစ်တမ်းများကောက်ယူခြင်းလုပ်ငန်းများကို ဆောင်ရွက်လျက်ရှိပါကြောင်း၊ စစ်တမ်းများကောက်ယူခြင်း၊ ဈေးနှုန်းကောက်ယူခြင်းနှင့် လူမှု-စီးပွားအညွှန်းကိန်းများ တောင်းခံရာ၌ စာရင်းအင်းနှင့် သက်ဆိုင်သောဌာနဆိုင်ရာအားလုံးက ပူးပေါင်းပါဝင်ဆောင်ရွက်ပေးကြရန် လိုအပ်ပါကြောင်း၊ ထိုသို့ ပူးပေါင်းပါဝင်ဆောင်ရွက်ခြင်းသည် စာရင်းအင်းဥပဒေအရ ပူးပေါင်းဆောင်ရွက်ရေး ယန္တရားကို တိတိကျကျ ရေးဆွဲပြဋ္ဌာန်းထားခြင်းအား အကောင်အထည်ဖော်ဆောင်ရွက်ရာ ရောက်ပါကြောင်း၊
နိဂုံးချုပ်အနေဖြင့် အမျိုးသားစာရင်းအင်းစနစ် အရည်အသွေးပြည့်ဝရေးအတွက် ပေါင်းစပ်ညှိနှိုင်းမှုစနစ်များ ဖွဲ့စည်းဆောင်ရွက်ခြင်း၊ သန်းခေါင်စာရင်းနှင့်စစ်တမ်းများ ကောက်ယူရာတွင် နည်းပညာအကူအညီများ၊ အကြံဉာဏ်များပေးအပ်ခြင်း၊ စာရင်းအင်းဆိုင်ရာဖွံ့ဖြိုးမှု အမျိုးသား အဆင့်မဟာဗျူဟာကို အကောင်အထည်ဖော်ခြင်း၊ မြန်မာနိုင်ငံ၏ တရားဝင်စာရင်းအင်းများ ထုတ်ပြန်ခြင်း၊ အားပေးမြှင့်တင်ခြင်းနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးတို့ကို ဆောင်ရွက်လျက်ရှိပါကြောင်း၊ အမျိုးသားစာရင်းအင်းစနစ် ဖွံ့ဖြိုးတိုးတက်ရန်အတွက် ဗဟို စာရင်းအင်းအဖွဲ့နှင့်အတူ စာရင်းအင်းအချက်အလက်ပံ့ပိုးပေးနေသည့်    ဌာနဆိုင်ရာများနှင့် ပုဂ္ဂလိကကဏ္ဍတို့အားလုံး ဝိုင်းဝန်းကြိုးပမ်းဆောင်ရွက်ရမည်ဖြစ်ပါကြောင်း ပြောကြားခဲ့ပါသည်။
ထို့နောက် ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ် ဦးသန်းဇော်မှ စာရင်းအင်း ဥပဒေနှင့်နည်းဥပဒေများတွင် ပြဋ္ဌာန်းထားသည့် အကြောင်းအရာများနှင့်စပ်လျဉ်း၍ ရှင်းလင်းပြောကြားပြီး တက်ရောက်လာသည့် ဌာနဆိုင်ရာများမှ သိလိုသည်များ မေးမြန်းဆွေးနွေးကာ ဆွေးနွေးပွဲကို မွန်းလွဲ (၁၂:၃၀) နာရီတွင် ရုတ်သိမ်းခဲ့ပါသည်။