ပြည်ထောင်စုဝန်ကြီး ဦးစိုးဝင်း တရုတ်-မြန်မာ စီးပွားရေးစင်္ကြံဆိုင်ရာ ဒုတိယအကြိမ် ပူးတွဲကော်မတီ အစည်းအဝေးသို့ တက်ရောက်

နေပြည်တော် ဖေဖော်ဝါရီ ၂၄

              စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်း ဦးဆောင်သော မြန်မာကိုယ်စားလှယ်အဖွဲ့သည် တရုတ်ပြည်သူ့သမ္မတနိုင်ငံ ယူနန်ပြည်နယ် ကူမင်းမြို့တွင် ဖေဖော်ဝါရီ ၂၁၊၂၂ ရက်နေ့တို့တွင် ကျင်းပသည့် တရုတ်-မြန်မာ စီးပွားရေးစင်္ကြံဆိုင်ရာ ဒုတိယ အကြိမ် ပူးတွဲကော်မတီ အစည်းအဝေးနှင့် ဒုတိယအကြိမ် တရုတ်-မြန်မာ စီးပွားရေးစင်္ကြံဖိုရမ်သို့ တက်ရောက်ခဲ့ကြသည်။

          ပြည်ထောင်စုဝန်ကြီး ဦးစိုးဝင်း ဦးဆောင်သော မြန်မာကိုယ်စားလှယ်အဖွဲ့တွင် မန္တလေး တိုင်းဒေသကြီး စီမံကိန်းနှင့် ဘဏ္ဍာရေးဝန်ကြီး ဦးမြတ်သူ၊ ရခိုင်ပြည်နယ် စိုက်ပျိုးရေး၊ မွေးမြူ ရေး၊ သစ်တောနှင့် သတ္တုတွင်းဝန်ကြီး ဦးကျော်လွင်၊ နိုင်ငံတော် စီးပွားရေးရာ ပေါင်းစပ်ညှိနှိုင်း ရေး ကော်မတီအဖွဲ့ဝင် ဦးမျိုးမြင့်၊ ပြည်သူ့လွှတ်တော် ဘဏ်များနှင့်ငွေကြေးဆိုင်ရာ ဖွံ့ဖြိုးတိုး တက်ရေးကော်မတီ ဥက္ကဌ ဒေါ်ခင်စန်းလှိုင်၊ မြန်မာ့ဖွံ့ဖြိုးမှုအဖွဲ့အစည်းမှ အမှုဆောင်ဒါရိုက်တာ လျှပ်စစ်နှင့် စွမ်းအင်ဝန်ကြီးဌာနနှင့် စီမံကိန်းနှင့် ဘဏ္ဍာရေးဝန်ကြီးဌာနမှ အမြဲတမ်း အတွင်းဝန် များ၊ မြန်မာ့မီးရထား အထွေထွေမန်နေဂျာနှင့် ဌာနဆိုင်ရာ တာဝန်ရှိသူများ၊ မြန်မာနိုင်ငံ ကုန်သည် များနှင့် စက်မှုလက်မှုလုပ်ငန်းရှင်များအသင်းချုပ်မှ ဒုတိယဥက္ကဌ ဦးသိန်းဟန်နှင့် စီးပွားရေး လုပ်ငန်းရှင်များ လိုက်ပါခဲ့ကြသည်။

သွားရောက်လေ့လာ

        မြန်မာကိုယ်စားလှယ်အဖွဲ့သည် ဖေဖော်ဝါရီ ၂၀ ရက် နံနက်ပိုင်းတွင် တရုတ်-မြန်မာ မီးရထားလမ်း ကူမင်း-တလီ အစိတ်အပိုင်းကို သွားရောက်လေ့လာခဲ့ပြီး ယူနန် Europe-Asia နို့ထွက်ပစ္စည်းကုမ္ပဏီနှင့် Yunnan Liangxun လယ်ယာထွက်ကုန်ကုမ္ပဏီ (Dali လယ်ယာ ထွက်ကုန်ပစ္စည်း ရောင်းဝယ်ရေး စျေးကွက်)သို့ သွားရောက်​လေ့လာခဲ့သည်။

          ဖေဖော်ဝါရီ ၂၁ ရက်တွင် ပြည်ထောင်စုဝန်ကြီးနှင့်အဖွဲ့သည် ဒေသန္တရပူးပေါင်းဆောင်ရွက် ရေးဆွေးနွေးပွဲ၊ ရေအားလျှပ်စစ်နည်းပညာ အလုပ်ရုံဆွေးနွေးပွဲနှင့် ဆွေးနွေးပွဲများသို့ တက်ရောက် ခဲ့ပြီး မွန်းလွဲပိုင်းတွင် တရုတ်-မြန်မာ စီးပွားရေးစင်္ကြံပူးတွဲကော်မတီ ဒုတိယအကြိမ်မြောက် အစည်းအဝေးသို့ တက်ရောက်ခဲ့သည်။

          အစည်းအဝေးတွင် ပြည်ထောင်စုဝန်ကြီး ဦးစိုးဝင်းနှင့် တရုတ်ပြည်သူ့သမ္မတနိုင်ငံ အမျိုး သားဖွံ့ဖြိုးတိုးတက်ရေးနှင့် ပြုပြင်ပြောင်းလဲမှုကော်မရှင် ဒုတိယဥက္ကဌ Mr.Ning Jizhe တို့က အဖွင့်အမှာစကား ပြောကြားခဲ့သည်။ ယူနန်ပြည်နယ်နှင့် မန္တလေးတိုင်းဒေသကြီးအကြား၊ စိန့်ကျိန် မြို့နှင့် ရခိုင်ပြည်နယ်တို့အကြား ​ဒေသန္တရစီးပွားရေး ပူးပေါင်းဆောင်ရွက်ရန်ကိစ္စများ၊ တရုတ်-မြန်မာ စီးပွားရေးစင်္ကြံပူးတွဲကော်မတီ၏ ဆောင်ရွက်ရမည့် လုပ်ငန်းစဉ်များ၊ တရုတ်-မြန်မာ စီးပွားရေးစင်္ကြံ အဓိကအစီအစဉ်၊ တရုတ်-မြန်မာစီးပွားရေးစင်္ကြံတွင် ပူးပေါင်းဆောင်ရွက်မည့် စီမံကိန်းများ အဆိုပြုရန်ကိစ္စများ၊ ကျောက်ဖြူအထူးစီးပွားရေးဇုန်၏ ဆောင်ရွက်နေသည့် အစီ အစဉ်နှင့် တရုတ်-မြန်မာမီးရထားလမ်းစီမံချက်များ အစည်းအဝေးသို့လည်းကောင်း တက်ရောက် ခဲ့ပြီး ယူနန်ဆောက်လုပ်ရေးရင်းနှီးမြှုပ်နှံရေးအုပ်စုသို့ သွားရောက်လေ့လာခဲ့သည်။

ခေါင်းစဉ်အလိုက်ဆွေးနွေး

          ဒုတိယအကြိမ် တရုတ်-မြန်မာစီးပွားရေးစင်္ကြံဖိုရမ်ကို ဖေဖော်ဝါရီ ၂၂ရက်တွင် တရုတ် ပြည်သူ့သမ္မတနိုင်ငံ ယူနန်ပြည်နယ် ကူမင်းမြို့ Banquet Hall of Inter Continental Hotel ၌ ကျင်းပခဲ့သည်။

          ဖိုရမ်တွင် ယူနန်ပြည်နယ်အုပ်ချုပ်ရေးမှူး မစ္စတာဝမ်ရှန်ဖားက အဖွင့်အမှာစကား ပြော ကြားခဲ့သည်။ ထို့နောက် တရုတ်ပြည်သူ့သမ္မတနိုင်ငံ ရှန်ဟိုင်းစည်ပင်သာယာရေးနှင့် ပြုပြင် ပြောင်းလဲရေးကော်မရှင် ဒုတိယညွှန်ကြားရေးမှူးချုပ် မစ္စတာဇူးမင်က Pudongမြို့ သာယာ လှပရေး ခေါင်းစဉ်ဖြင့်လည်းကောင်း၊ ရခိုင်ပြည်နယ်ဝန်ကြီး ဦးကျော်လွင်က ကျောက်ဖြူအထူး စီးပွားရေးဇုန် စီမံကိန်းခေါင်းစဉ်ဖြင့် လည်းကောင်း တရုတ် ပြည်သူ့သမ္မတနိုင်ငံ ယဉ်ကျေးမှုနှင့် ခရီးသွားလာရေးဝန်ကြီးဌာန ဒုတိယအကြံပေး မစ္စတာ ရှန်းရှီလောင်က တရုတ်-မြန်မာ ခရီးသွား လုပ်ငန်းဖွံ့ဖြိုးတိုးတက်ရေး ခေါင်းစဉ်ဖြင့်လည်းကောင်း၊ မြန်မာ့မီးရထား အထွေထွေမန်နေဂျာ ဦးအောင်ဝင်းက တရုတ်-မြန်မာ (ရွှေလီ-မန္တလေး) ရထားလမ်းသစ် ဖောက်လုပ်ရေး ခေါင်းစဉ်ဖြင့် လည်းကောင်း၊ တရုတ်ပြည်သူ့သမ္မတနိုင်ငံ အမျိုးသားဖွံ့ဖြိုးတိုးတက်မှုနှင့် ပြုပြင်ပြောင်းလဲရေး ကော်မရှင် နိုင်ငံခြားစီးပွားရေး လေ့လာမှု အင်စတီကျု ညွှန်ကြားရေးမှူးချုပ် မစ္စတာ ယီဖုကျင်က တရုတ်-မြန်မာ ပူးပေါင်းဆောင်ရွက်မှု ပိုမိုမြှင့်တင်ရေး ခေါင်းစဉ်ဖြင့်လည်းကောင်း၊ မြန်မာနိုင်ငံ ဖွံ့ဖြိုးတိုးတက်မှု အင်စတီကျု အမှုဆောင် ဒါရိုက်တာ ဒေါက်တာမင်းရဲပိုင်ဟိန်းက တရုတ်-မြန်မာ စီးပွားရေးစင်္ကြံအဓိက အစီအစဉ်ဖြင့်လည်းကောင်း၊ ယူနန်တက္ကသိုလ် ဒုတိယဥက္ကဌ မစ္စတာ လီချန်းယန်က တရုတ်-မြန်မာ စီးပွားရေးစင်္ကြံ၏အရေးပါမှု အခန်းကဏ္ဍကိုလည်းကောင်း၊ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်မှ ဒုတိယဥက္ကဌ ဦးသိန်း ဟန်က တရုတ်-မြန်မာ စီးပွားရေးစင်္ကြံတွင် ပုဂ္ဂလိကကဏ္ဍ၏ ပူးပေါင်းပါဝင်မှု ခေါင်းစဉ်ဖြင့် လည်းကောင်း၊ တရုတ်ဖွံ့ဖြိုး တိုးတက်ရေးဘဏ် (ယူနန်ဘဏ်ခွဲ) ဒုတိယဥက္ကဌ မစ္စတာ ဖန်ဂျင်းဂျန် က တရုတ်-မြန်မာ စီးပွားရေးစင်္ကြံစီမံကိန်းတွင် တရုတ်ဖွံ့ဖြိုးမှုဘဏ်၏ ပူးပေါင်းဆောင်ရွက်နိုင်မှု မိတ်ဆက်ခြင်းဖြင့်လည်းကောင်း၊ ရန်ကုန်မြို့သစ် ဖွံ့ဖြိုးတိုးတက်မှု ကုမ္ပဏီလီမိတက် ဥက္ကဌ ဦးသိမ်းဝေက ရန်ကုန်မြို့သစ်စီမံကိန်း အကောင်အထည်ဖော်ဆောင်ရွက်ရေး ခေါင်းစဉ်ဖြင့် လည်း ကောင်း၊ Ali Cross-Border Ecommerce Research Center ဒါရိုက်တာ မစ္စတာ ဝူယန်ချန်းက နှစ်နိုင်ငံ ဖွံ့ဖြိုးတိုးတက်မှု မြှင့်တင်နိုင်ရေး ခေါင်းစဉ်ဖြင့်လည်းကောင်း၊ အေးရှားဝေါလ် ကုမ္ပဏီ ဥက္ကဌ ဦးထွန်းမြင့်နိုင်က မြန်မာနိုင်ငံတွင် ရင်းနှီးမြှုပ်နှံမှု အခွင့်အလမ်းများ ခေါင်းစဉ်ဖြင့် လည်းကောင်း၊ တရုတ်ပြည်သူ့သမ္မတနိုင်ငံ စက်မှုနှင့်စီးပွားရေးဘဏ် (ရန်ကုန်ဘဏ်ခွဲ) ဥက္ကဌ မစ္စတာဟီဘီကျန်က ဘဏ္ဍာငွေကြေးဆိုင်ရာ ပူးပေါင်းဆောင်ရွက်နိုင်မှု ခေါင်းစဉ် ဖြင့်လည်းကောင်း အသီးသီး ဆွေးနွေးခဲ့ကြသည်။

လက်မှတ်ရေးထိုး

          နှစ်နိုင်ငံ အကျိုးစီးပွား ဖြစ်ထွန်းစေရန် ရည်ရွယ်ပြီး တရုတ်-မြန်မာ စီးပွားရေး စင်္ကြံကို နှစ်နိုင်ငံစီးပွားရေးအဖွဲ့က ပူးပေါင်းဆောင်ရွက်ခြင်း ဖြစ်သည်။ အဆိုပါ စီးပွားရေးစင်္ကြံသည် Belt and Road Initiative စီမံကိန်း၏ အဓိကကျသော ကဏ္ဍတစ်ခုတွင် ပါဝင်သည်။ ၂၀၁၇ ခုနှစ် ဒီဇင်ဘာလတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တရုတ်သမ္မတ မစ္စတာ ရှီကျင့်ဖျင်တို့က နှစ်နိုင်ငံ လက်တွေ့ကျကျ ပူးပေါင်းဆောင်ရွက်နိုင်မှု၊ နှစ်နိုင်ငံအပြန်အလှန် အကျိုးကျေးဇူးပြုမှုနှင့် နှစ်နိုင်ငံ ပြည်သူပြည်သားများ၏ အကျိုးစီးပွားကို ရှေ့ရှုပြီး တရုတ်-မြန်မာ စီးပွားရေးစင်္ကြံ အကောင်အထည်ဖော်ဆောင်မှုကို သဘောတူညီခဲ့ကြသည်။ ၂၀၁၈ ခုနှစ်မှစပြီး တရုတ်-မြန်မာ စီးပွားရေးစင်္ကြံ အကောင်အထည်ဖော်ဆောင်မှုသည် အရှန်အဟုန်မြှင့် တိုးတက်မှု ရရှိလာခဲ့သည်။ ၂၀၁၈ ခုနှစ် စက်တင်ဘာလတွင် ပြည်ထောင်စုဝန်ကြီး ဦးစိုးဝင်းနှင့် တရုတ် ပြည်သူ့သမ္မတနိုင်ငံ အမျိုးသား ဖွံ့ဖြိုးတိုးတက်မှုနှင့် ပြုပြင်ပြောင်းလဲရေး ကော်မရှင်ဥက္ကဌ မစ္စတာ လီဟီဖန်တို့သည် တရုတ်-မြန်မာ စီးပွားရေးစင်္ကြံ တည်ဆောက်ရေးဆိုင်ရာ နားလည်မှုစာချွန်လွှာ ကို နှစ်နိုင်ငံ အကြီးအကဲများကိုယ်စား လက်မှတ်ရေးထိုးခဲ့သည်။

          အဆိုပါ တရုတ်-မြန်မာ စီးပွားရေးစင်္ကြံ တည်ဆောက်ရေးကို ပိုမိုလက်တွေ့ကျကျ အကောင်အထည်ဖော်ဆောင်နိုင်ရန် ရည်ရွယ်ပြီး တရုတ်ပြည်သူ့သမ္မတနိုင်ငံ အမျိုးသားဖွံ့ဖြိုးမှုနှင့် ပြုပြင်ပြောင်းလဲရေးကော်မရှင်၊ ယူနန်စီရင်စုအစိုးရနှင့် စီမံကိန်းနှင့် ဘဏ္ဍာရေးဝန်ကြီးဌာနတို့မှ ဒုတိယအကြိမ်မြောက် တရုတ်-မြန်မာ စီးပွားရေး စင်္ကြံဖိုရမ်ကို ပူးပေါင်းကျင်းပခဲ့ခြင်း ဖြစ်သည်။ ထို့ပြင် စီးပွားရေးစင်္ကြံဖိုရမ်မှတစ်ဆင့် နှစ်နိုင်ငံ သက်ဆိုင်ရာ ဌာနများအပါအဝင် စီးပွားရေး အဖွဲ့အစည်းများနှင့် လုပ်ငန်းရှင်များများအတွက် နှစ်နိုင်ငံ စီမံကိန်း၊ ရင်းနှီးမြှုပ်နှံမှု၊ ပို့ဆောင်ရေး၊ စွမ်းအင်၊ စိုက်ပျိုးရေး၊ ဒီဂျစ်တယ်၊ ပိုးလမ်းမ စီမံကိန်း၊ ဘဏ္ဍာရေး၊ ခရီးသွား လာရေးလုပ်ငန်း၊ သဘာဝပတ်ဝန်းဂျင် ထိန်းသိမ်းစောင့်ရှောက်ရေး စသည့်ကဏ္ဍများတွင် ပူးပေါင်းဆောင်ရွက်နိုင်ရန် များစွာအကျိုးကျေးဇူး ဖြစ်ထွန်းစေခဲ့ကြောင်း သိရသည်။(သတင်းစဉ်)