အမျိုးသားအဆင့်ကုန်သွယ်မှုလွယ်ကူချောမွေ့စေရေးကော်မတီ၏ (၂/၂၀၂၂) ကြိမ်မြောက် အစည်းအဝေး ကျင်းပ

နေပြည်တော်၊ ဇူလိုင် ၈ ရက်

အမျိုးသားအဆင့်ကုန်သွယ်မှုလွယ်ကူချောမွေ့စေရေးကော်မတီ၏ (၂/၂၀၂၂) ကြိမ်မြောက် အစည်းအဝေးကို ယနေ့၊ နံနက် (၁၀:၀၀) နာရီတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီး ဌာန၊ အစည်းအဝေးခန်းမ၌ Virtual စနစ်ဖြင့် ကျင်းပသည်။ အစည်းအဝေးသို့ ကော်မတီဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးညွန့်အောင်၊ ပူးတွဲဥက္ကဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း၊ ကော်မတီအဖွဲ့ဝင်များဖြစ်ကြသည့် သက်ဆိုင်ရာဦးစီးဌာနများမှ ညွှန်ကြားရေးမှူးချုပ် များနှင့် ဌာနဆိုင်ရာအဆင့်မြင့်ကိုယ်စားလှယ်များက ကိုယ်တိုင်လည်းကောင်း၊ Virtual စနစ်ဖြင့်လည်းကောင်း တက်ရောက်ကြသည်။ အစည်းအဝေးတွင် ဦးစွာ ကော်မတီပူးတွဲဥက္ကဌ၊ ဒုတိယဝန်ကြီး ဦးမောင်မောင်ဝင်းက အဖွင့်အမှာစကားပြောကြားရာတွင် ၂၂-၂-၂၀၁၇ ရက်၌ စတင်အသက်ဝင်ခဲ့သည့် ကမ္ဘာ့ကုန်သွယ်ရေးအဖွဲ့၏ ကုန်သွယ်မှုလွယ်ကူချောမွေ့စေရေး သဘောတူညီချက်ပါ ပြဋ္ဌာန်းချက်များကို အကောင်အထည်ဖော်ဆောင်ရွက်နိုင်ရေးအတွက် မြန်မာနိုင်ငံအနေဖြင့် အမျိုးသားအဆင့်ကုန်သွယ်မှုလွယ်ကူ ချောမွေ့စေရေး ကော်မတီကို ဖွဲ့စည်းဆောင်ရွက်လျက်ရှိကြောင်း၊ ကော်မတီအနေဖြင့် သဘောတူစာချုပ်ပါ လုပ်ငန်းတာဝန်များကို ထိရောက်စွာအကောင်အထည်ဖော်နိုင်ရေးအတွက် သက်ဆိုင်ရာလုပ်ငန်းနယ်ပယ်အလိုက် လုပ်ငန်းအဖွဲ့များ ဖွဲ့စည်းဆောင်ရွက်လျက်ရှိကြောင်း၊ အကောင် အထည်ဖော်ရမည့်သဘောတူစာချုပ်ပါ Measures များကို သတ်မှတ်ချိန်အတွင်း ပြီးပြတ်အောင် အကောင်အထည်ဖော်ဆောင်ရွက်ရမည်ဖြစ်ရာ အခက်အခဲများရှိပါက သက်တမ်းတိုးမြှင့်ခွင့်ရရှိရေးကိစ္စများကို ကြိုတင်ဆောင်ရွက်သွားရန်လိုကြောင်း၊ သို့ဖြစ်၍ ဆက်စပ် ဆောင်ရွက်ရမည့် ကုန်သွယ်ရေးဦးစီးဌာန၊ အကောက်ခွန်ဦးစီးဌာနနှင့် စားသုံးသူရေးရာဦးစီးဌာနတို့အနေဖြင့် သဘောတူစာချုပ်ပါ Measures များကို သတ်မှတ်ချိန်အတွင်း ပြီးပြတ်အောင်ဆောင်ရွက်နိုင်ရေးအတွက် အချိန်နှင့်တစ်ပြေးညီ ညှိနှိုင်းဆောင်ရွက်သွားရန် ဖြစ်ကြောင်း စသည်ဖြင့် ပြောကြားပါသည်။ ထို့နောက် ကော်မတီဥက္ကဌ၊ ဒုတိယဝန်ကြီး ဦးညွန့်အောင်က ပြောကြားရာတွင် ကုန်သွယ်မှုလွယ်ကူချောမွေ့စေရေးအတွက်ဆောင်ရွက်ကြရာ၌ ဆက်စပ်ပါဝင်သည့် ဌာနများအနေဖြင့် Myanmar Automated Cargo Clearance System (MACCS), Trade Net 2.0 များဖြင့် ဆောင်ရွက်လျက်ရှိပြီး တစ်ဖက်တွင်လည်း National Single Window လုပ်ငန်းစနစ်များဖြင့် ဆောင်ရွက်လျက်ရှိကြောင်း၊ ကမ္ဘာ့ကုန်သွယ်ရေးအဖွဲ့၏ ကုန်သွယ်မှုလွယ်ကူချောမွေ့စေရေး သဘောတူညီချက်ပါ ပြဋ္ဌာန်းချက်များကို အကောင်အထည်ဖော်ဆောင်ရွက်ရာတွင် ယခုအခါ Technical Assistance and Capacity Building (TACB) Requirement Notification ကို ကမ္ဘာ့ကုန်သွယ်ရေးအဖွဲ့သို့ ပေးပို့ခဲ့ပြီးဖြစ်ကြောင်း၊ နောက်ဆက်တွဲအနေဖြင့် TACB Arrangement and Progress Notification ကို ဆက်လက်ပေးပို့နိုင်ရေးအတွက် ဆောင်ရွက်လျက်ရှိကြောင်း၊ အချိန်မီ ပေးပို့နိုင်ရေးအတွက် ပူးပေါင်းဆောင်ရွက်ကြရန်ဖြစ်ကြောင်း စသည်ဖြင့် ပြောကြားပါသည်။ ဆက်လက်၍ ကော်မတီအစည်းအဝေးကို အစီအစဉ်အတိုင်းကျင်းပရာ ကော်မတီအောက်ရှိ လုပ်ငန်းအဖွဲ့ (၄) ဖွဲ့မှ အဖွဲ့ခေါင်းဆောင်များက သက်ဆိုင်ရာကဏ္ဍအလိုက် ဆောင်ရွက်ပြီးစီးမှု အခြေအနေများနှင့် ဆက်လက်ဆောင်ရွက်သွားမည့်အခြေအနေများကို တင်ပြကြပြီး၊ ကော်မတီဝင်များက ဝိုင်းဝန်းဆွေးနွေး၍ ကော်မတီဝင်များ၏ ဆွေးနွေးမှုများအပေါ် ကော်မတီဥက္ကဌနှင့် ပူးတွဲ ဥက္ကဌတို့က ပြန်လည်ရှင်းလင်းဆွေးနွေးကြပြီးနောက် ကော်မတီပူးတွဲဥက္ကဌက နိဂုံးချုပ်အမှာ စကားပြောကြားကာ အစည်းအဝေးကို ရုပ်သိမ်းခဲ့သည်။ အမျိုးသားအဆင့် ကုန်သွယ်မှုလွယ်ကူချောမွေ့စေရေးကော်မတီကို ၂၆-၁၀-၂၀၂၁ ရက်တွင် ပြန်လည်ဖွဲ့စည်းခဲ့ပြီး၊ စီမံကိန်းနှင့်ဘဏ္ဍာရေးဝန်ကြီးဌာနနှင့် စီးပွားရေးနှင့်ကူးသန်းရောင်းဝယ်ရေးဝန်ကြီးတို့က ပူးတွဲဦးဆောင်ကာ ကော်မတီ၏အောက်တွင် ဆက်သွယ်ဆောင်ရွက်မှုနှင့် ပွင့်လင်းမြင်သာရှိမှုဆိုင်ရာလုပ်ငန်းများ အကောင်အထည်ဖော်ရေးအဖွဲ့၊ ပြတင်းတစ်ပေါက်စနစ် ဆိုင်ရာလုပ်ငန်းများ အကောင်အထည်ဖော်ရေးအဖွဲ့၊ ဆုံးရှုံးနိုင်ခြေစီမံခန့်ခွဲမှုဆိုင်ရာလုပ်ငန်းများ အကောင်အထည်ဖော်ရေးအဖွဲ့နှင့် စမ်းသပ်စစ်ဆေးမှုဆိုင်ရာလုပ်ငန်းများ အကောင်အထည်ဖော်ရေးအဖွဲ့ဟူ၍ လုပ်ငန်းအဖွဲ့ (၄) ခုဖြင့် ဖွဲ့စည်းဆောင်ရွက်လျက်ရှိသည်။ မြန်မာနိုင်ငံသည် ကမ္ဘာ့ကုန်သွယ်ရေးအဖွဲ့၏ အဖွဲ့ဝင်နိုင်ငံတစ်နိုင်ငံဖြစ်ရာ ကမ္ဘာ့ကုန်သွယ်ရေးအဖွဲ့၏ ကုန်သွယ်မှုလွယ်ကူချောမွေ့စေရေး သဘောတူညီချက်ပါ ပြဋ္ဌာန်းချက်များကို လိုက်နာအကောင်အထည်ဖော်နိုင်ရန် ကြိုးပမ်းဆောင်ရွက်လျက်ရှိကြောင်း သတင်းရရှိသည်။(သတင်းစဉ်)