ရုရှားဖက်ဒရေးရှင်းနိုင်ငံ စိန့်ပီတာစဘတ်မြို့တွင် ကျင်းပသည့် (၂၅) ကြိမ်မြောက် နိုင်ငံတကာစီးပွားရေးဖိုရမ် (25th St. Petersburg International Economic Forum- SPIEF’ 22) သို့ မြန်မာကိုယ်စားလှယ်အဖွဲ့ တက်ရောက်

စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး  ဦးဝင်းရှိန်၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးအောင်နိုင်ဦး၊ အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီး ဦးကိုကိုလှိုင်၊ လျှပ်စစ်စွမ်းအား ဝန်ကြီးဌာနနှင့် စွမ်းအင်ဝန်ကြီးဌာန၊ ပြည်ထောင်စုဝန်ကြီး ဦးသောင်းဟန်၊ စီးပွားရေးနှင့် ကူးသန်ရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာပွင့်ဆန်းနှင့် မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌ ဒေါ်သန်းသန်းဆွေတို့ပါဝင်သည့် မြန်မာကိုယ်စားလှယ်အဖွဲ့သည် ရုရှား ဖက်ဒရေးရှင်းနိုင်ငံ၏ သမ္မတအကြံပေးနှင့် (၂၅) ကြိမ်မြောက် နိုင်ငံတကာစီးပွားရေးဖိုရမ် ကျင်းပရေးကော်မတီ၏ အမှုဆောင်အတွင်းရေးမှူးဖြစ်သူ Mr. Anton Kobyakov ၏ ဖိတ်ကြားချက်အရ ရုရှားဖက်ဒရေးရှင်းနိုင်ငံ၊ စိန့်ပီတာစဘတ်မြို့တွင် ဇွန်လ ၁၅ ရက်နေ့မှ   ၁၈ ရက်နေ့အထိကျင်းပသည့် (၂၅) ကြိမ်မြောက် စိန့်ပီတာစဘတ် နိုင်ငံတကာစီးပွားရေး ဖိုရမ်သို့ တက်ရောက်ခဲ့သည်။

ဖိုရမ်မတိုင်မီ ဇွန်လ ၁၄ ရက်နေ့၊ မွန်းလွဲပိုင်းတွင် လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊ ပြည်ထောင်စုဝန်ကြီး ဦးသောင်းဟန်နှင့် ကိုယ်စားလှယ်အဖွဲ့သည် Sigma LLC Co., Ltd. မှ Deputy Director General for Foreign Economic Relations ဖြစ်သူ Mr. Rodionov Nikitaအား လက်ခံတွေ့ဆုံ၍ ရေနံထွက်ပစ္စည်းများထုတ်လုပ်ရေး၊ တင်သွင်းရောင်းချ ရေးနှင့် ရေနံချက်စက်ရုံတည်ဆောက်ရေးဆိုင်ရာ ကိစ္စရပ်များနှင့် စပ်လျဉ်း၍ ဆွေးနွေးခဲ့ကြသည်။

ဖိုရမ်၏ ပထမနေ့ဖြစ်သည့် ဇွန်လ ၁၅ ရက်နေ့မွန်းလွဲပိုင်းတွင် မြန်မာကိုယ်စား လှယ်အဖွဲ့ဝင် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စု ဝန်ကြီး ဦးအောင်နိုင်ဦးသည် ရုရှားဖက်ဒရေးရှင်းနိုင်ငံ၊ စွမ်းအင်ကုမ္ပဏီဖြစ်သော Sigma LLC Co., Ltd. မှ တာဝန်ရှိသူများအား လက်ခံတွေ့ဆုံခဲ့ပြီး မြန်မာနိုင်ငံ၏ စွမ်းအင်ကဏ္ဍတွင် လာရောက်ရင်းနှီးမြှုပ်နှံရေးအတွက် အခွင့်အလမ်းများနှင့် လုပ်ထုံးလုပ်နည်းများကို ရှင်းလင်းဆွေးနွေးခဲ့သည်။ ထို့ပြင် လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊ ပြည် ထောင်စုဝန်ကြီး ဦးသောင်းဟန်နှင့်အဖွဲ့သည် စိန့်ပီတာစဘတ်မြို့ရှိ Baltic Shipyard သို့ သွား‌ ရောက်လေ့လာခဲ့ရာ Civil Shipbuilding Markets Development, United Shipbuilding Corporation မှ Deputy General Director ဖြစ်သူ Mr. David Adamiya က တည်ဆောက်အသုံးပြုနေသော ရေခဲခွဲသင်္ဘောများ၊ ရေပေါ်ဓာတ်အားပေးစက်ရုံများ အကြောင်းကို ရှင်းလင်းတင်ပြခဲ့ပြီး Shipyard အတွင်း သင်္ဘောများတည်ဆောက်နေမှုကို လှည့်လည်ကြည့်ရှုလေ့လာခဲ့သည်။

ညနေပိုင်းတွင် ပြည်ထောင်စုဝန်ကြီး ဦးဝင်းရှိန်၊ ဦးအောင်နိုင်ဦး၊ ဦးကိုကိုလှိုင်၊ ဒေါက်တာ ပွင့်ဆန်းနှင့် မြန်မာကိုယ်စားလှယ်အဖွဲ့သည် ရုရှားဖက်ဒရေးရှင်းနိုင်ငံဆိုင်ရာ မြန်မာသံအမတ်ကြီး ဦးလွင်ဦးနှင့်အတူ ဥရောပအာရှစီးပွားရေးကော်မရှင်၊ မေခရိုစီးပွားရေးနှင့် ပေါင်းစည်းရေးဝန်ကြီး H. E. Mr. Sergei Glazyev မှ တည်ခင်းသည့် အလုပ်သဘော ညစာစားပွဲသို့ တက်ရောက်၍ နှစ်နိုင်ငံဘဏ်လုပ်ငန်းနှင့် ငွေပေးငွေယူကိစ္စရပ်များ၊ ရင်းနှီးမြှုပ်နှံမှုနှင့် ကုန်သွယ်မှုဆိုင်ရာကိစ္စရပ်များ၊ မြန်မာနိုင်ငံနှင့် ဥရောပအာရှ စီးပွားရေးသမဂ္ဂ အဖွဲ့ဝင်နိုင်ငံများအကြား စီးပွားရေးပူးပေါင်းဆောင်ရွက်မှု မြှင့်တင်ရေးကိစ္စရပ်များ၊ မြန်မာနိုင်ငံနှင့် ဥရောပအာရှ စီးပွားရေးကော်မရှင်တို့အကြား ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ (Memorandum of Cooperation) လက်မှတ်ရေးထိုးရေးကိစ္စရပ်များ၊ နှစ်နိုင်ငံအကြား  လက်တွေ့လုပ်ငန်းစဉ်ဆိုင်ရာ စွမ်းဆောင်ရည်မြှင့်တင်ရေးအစီအစဉ်များ၊ အာဆီယံနှင့် ဥရောပ-အာရှ စီးပွားရေးကော်မရှင်အကြား ပေါင်းစပ်ဆောင်ရွက်မှု တိုးမြှင့်ရေးနှင့် မြန်မာနိုင်ငံနှင့် ဥရောပ-အာရှ စီးပွားရေးကော်မရှင်တို့အကြား လွတ်လပ်သော ကုန်သွယ်မှု သဘောတူစာချုပ်ရေးထိုးနိုင်ရေးတို့နှင့် စပ်လျဉ်း၍ အမြင်ချင်း ဖလှယ်ဆွေးနွေး ခဲ့သည်။

ဖိုရမ်ဒုတိယနေ့ဖြစ်သည့် ဇွန်လ ၁၆ ရက်နေ့တွင် မြန်မာကိုယ်စားလှယ်အဖွဲ့သည် အီးအေအီးယူ-အာဆီယံ (EAEU-ASEAN) ဆွေးနွေးပွဲသို့ တက်ရောက်ခဲ့သည်။ အဆိုပါ ဆွေးနွေးပွဲတွင် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးသည် ဆွေးနွေးပြောကြားသူအဖြစ် ပါဝင်တက်ရောက်ကာ အီးအေ အီးယူနှင့်အာဆီယံတို့အကြား သိပ္ပံနှင့်နည်းပညာနှင့်စက်မှုပူးပေါင်းဆောင်ရွက်ရေး၊ စွမ်းအင် အသုံးပြုမှုတွင် ကာဗွန်လျှော့ချရေးနည်းလမ်းများ ပြောင်းလဲအသုံးပြုရေး၊ သဘာဝပတ် ဝန်းကျင်ထိန်းသိမ်းရေးနှင့် ရာသီဥတုပြောင်းလဲမှုဆိုင်ရာစီမံချက်များ ပူးပေါင်းအကောင် အထည်ဖော်ရေး၊ ဒီဂျစ်တယ်လုပ်ငန်းစဉ် အကောင်အထည်ဖော်ရေးနှင့် ဒီဂျစ်တယ် အခြေခံ အဆောက်အအုံထူထောင်ရေးဆိုင်ရာကိစ္စရပ်များကို ဆွေးနွေးခဲ့သည်။ ထို့နောက် ရင်းနှီး မြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦး နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာ ပွင့်ဆန်း တို့သည် ရုရှားဖက်ဒရေးရှင်းနိုင်ငံ၊ စီးပွားရေး ဖွံ့ဖြိုးတိုးတက်မှုဝန်ကြီးဌာန၊ ဝန်ကြီး H. E. Mr. Maksim Reshetnikov နှင့်တွေ့ဆုံ၍ ရုရှား-မြန်မာ အစိုးရအချင်းချင်း ကုန်သွယ် ရေးနှင့် စီးပွားရေးပူးပေါင်းဆောင်ရွက်ရေးပူးတွဲကော်မရှင် တတိယအကြိမ်အစည်းအဝေး ကို မြန်မာနိုင်ငံတွင် အိမ်ရှင်အဖြစ် လက်ခံကျင်းပရေး၊ ရုရှား-မြန်မာစီးပွားရေး ပူးပေါင်း ဆောင်ရွက်မှုဖွံ့ဖြိုးတိုးတက်ရေးမဟာဗျူဟာ (မူကြမ်း) လက်မှတ်ရေးထိုးရေး၊ နှစ်နိုင်ငံ ရင်း နှီးမြှုပ်နှံမှုနှင့် ကုန်သွယ်မှုမြှင့်တင်ရေးနှင့် ရုရှားစီးပွားရေးလုပ်ငန်းရှင်များအနေဖြင့် မြန်မာ နိုင်ငံတွင် စက်မှုဇုန်များထူထောင်၍ လာရောက်လုပ်ကိုင်ရေးတို့နှင့်စပ်လျဉ်း၍ နှစ်ဖက် ရင်းနှီးပွင့်လင်းစွာ ဆွေးနွေးခဲ့သည်။

ထို့ပြင်  လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊ ပြည်ထောင်စုဝန်ကြီး ဦးသောင်းဟန်နှင့်ကိုယ်စားလှယ်အဖွဲ့သည် ROSATOM State Nuclear Energy Corporation ၏ ညွှန်ကြားရေးမှူးချုပ်ဖြစ်သူ Mr. Alexey Likhachev အား လက်ခံတွေ့ဆုံခဲ့သည်။ ယင်းသို့တွေ့ဆုံရာတွင် ရုရှားနိုင်ငံ၏ နျူကလီးယားစွမ်းအင်ဆိုင်ရာ နည်းပညာအသုံးပြု၍ စက်ပစ္စည်းများ ထုတ်လုပ်ဆောင်ရွက်မှုအခြေအနေ၊ နျူကလီးယားစွမ်းအင် အသုံးပြုမှုနှင့်စပ်လျဉ်း၍ လိုအပ်သည့်ကိစ္စများအား ရှင်းလင်းပြောကြားခဲ့ပြီး ပြည်ထောင်စုဝန်ကြီးကလည်း မြန်မာနိုင်ငံ၏လျှပ်စစ်ဓာတ်အား ရရှိ၊ သုံးစွဲနိုင်မှု အခြေအနေကို ပြန်လည် ရှင်းလင်းဆွေးနွေးခဲ့သည်။

မြန်မာကိုယ်စားလှယ်အဖွဲ့ဝင် မြန်မာနိုင်ငံတော်ဗဟိုဘဏ် ဒုတိယက္ကဋ္ဌ ဒေါ်သန်းသန်းဆွေသည် ရုရှားဖက်ဒရေးရှင်းနိုင်ငံ SOV COM Bank မှ Managing Director နှင့် Head of Structured Finance and Financial Solution ဖြစ်သူ Ms. Olga Ermachenleo နှင့်တွေ့ဆုံ၍ ကူးသန်းရောင်းဝယ်ရေးဘဏ်များ၏ လုပ်ငန်းဆိုင်ရာကိစ္စရပ်များကို ဆွေးနွေး ခဲ့သည်။

ညပိုင်းတွင် မြန်မာကိုယ်စားလှယ်အဖွဲ့သည် ရုရှား-အာဆီယံ စီးပွားရေးကောင်စီ ဥက္ကဋ္ဌ Mr. Ivan Polyakov က တည်ခင်းသည့် အလုပ်သဘောညစာစားပွဲသို့ တက်ရောက် ပြီး မြန်မာနိုင်ငံနှင့်ရုရှားနိုင်ငံတို့အကြား နှစ်နိုင်ငံပူးပေါင်းဆောင်ရွက်ရေးဆိုင်ရာ ကိစ္စရပ်များ၊ အာဆီယံ-ရုရှား ပူးပေါင်း ဆောင်ရွက်မှုဆိုင်ရာများနှင့် မြန်မာ-ရုရှား ပုဂ္ဂလိကပူးပေါင်း ဆောင်ရွက်မှုများနှင့် စပ်လျဉ်း၍ ရင်းနှီးပွင့်လင်းစွာ ဆွေးနွေးခဲ့သည်။

ဖိုရမ်၏ တတိယနေ့ဖြစ်သည့် ဇွန်လ ၁၇ ရက်နေ့တွင် ပြည်ထောင်စုဝန်ကြီး ဦးဝင်း ရှိန်ဦးဆောင်သော မြန်မာကိုယ်စားလှယ်အဖွဲ့သည် ရုရှား-အာဆီယံ စီးပွားရေးကောင်စီ ဥက္ကဋ္ဌ Mr. Ivan Polyakov နှင့် တွေ့ဆုံ၍ နှစ်နိုင်ငံရင်းနှီးမြှုပ်နှံမှုနှင့် ကုန်သွယ်မှုတိုးတက် ဆောင်ရွက်နိုင်ရေး၊ ဘဏ်လုပ်ငန်းဆိုင်ရာကိစ္စများ လွယ်ကူချောမွေ့စေရေး၊ နိုင်ငံတွင်း စိုက်ပျိုးရေး၊ မွေးမြူရေးထုတ်ကုန်များ ပိုမိုတိုးတက်ထွက်ရှိရန်နှင့် ပြည်ပသို့ တိုးချဲ့တင်ပို့နိုင်ရန်အတွက် နည်းပညာဆိုင်ရာပံ့ပိုးကူညီနိုင်ရေး၊ စွမ်းအင်ဆိုင်ရာပူးပေါင်းဆောင်ရွက်မှုများ တိုးမြှင့်နိုင်ရေး၊ ဒီဂျစ်တယ်နည်းပညာဆိုင်ရာပူးပေါင်းဆောင်ရွက်ရေး၊ အခြေခံ အဆောက် အအုံဖွံ့ဖြိုးတိုးတက်စေရေး၊ သတင်းအချက်အလက်များ အပြန်အလှန်ဖလှယ်နိုင်ရေး၊ နည်းပညာနှင့် စီးပွားရေးဖွံ့ဖြိုးတိုးတက်မှုတို့အတွက် ကူညီပံ့ပိုးရေး၊ ဆီချောစက်ရုံများ၊ ဓာတ်မြေ ဩဇာစက်ရုံများ၊ ရာဘာစက်ရုံများ တည်ဆောက်ရေးနှင့် အဆင့်မြှင့်တင်ရေး၊ နှစ်နိုင်ငံ လေကြောင်းလိုင်းပြေးဆွဲရေးနှင့် ခရီးသွားလုပ်ငန်းတို့တွင် ပူးပေါင်းဆောင်ရွက်ရေး၊ စက်သုံးဆီ သိုလှောင်ကန်နှင့် အခြေခံအဆောက်အအုံကဏ္ဍ ဖွံ့ဖြိုးတိုးတက်ရေး၊ ဘာသာစကားနှင့် ယဉ်ကျေးမှုပူးပေါင်းဆောင်ရွက်ရေးဆိုင်ရာကိစ္စရပ်များကို အမြင်ချင်း ဖလှယ်ဆွေးနွေးခဲ့ သည်။ ထို့ပြင် မြန်မာနိုင်ငံရင်းနှီးမြှုပ်နှံမှုဆိုင်ရာ သတင်းအချက်အလက်နှင့် ဥပဒေ၊ လုပ်ထုံးလုပ်နည်း စာအုပ်စာစောင်များကို ပေးအပ်ခဲ့ပြီး မြန်မာနိုင်ငံတွင်လက်ခံကျင်းပမည့် ရုရှား-မြန်မာအစိုးရအချင်းချင်း ကုန်သွယ်ရေးနှင့် စီးပွားရေးပူးပေါင်းဆောင်ရွက်ရေး ပူးတွဲ ကော်မရှင် တတိယအကြိမ် အစည်းအဝေးတွင် ရုရှား-အာဆီယံ စီးပွားရေးကောင်စီမှလည်း  ပါဝင် တက်ရောက်နိုင်ရေးအတွက် ဖိတ်ကြားခဲ့သည်။

လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊ ပြည်ထောင်စုဝန်ကြီးသည်  မြန်မာ သံအမတ်ကြီး ဦးလွင်ဦးနှင့်အတူ ဖိုရမ်တတိယနေ့၊ နံနက်ပိုင်းတွင် Park Inn by Radisson Pulkovskaya ၌ ကျင်းပပြုလုပ်သော INTER RAO-Export LLC နှင့် လျှပ်စစ် စွမ်းအားစီမံရေးဦးစီးဌာနတို့အကြား လျှပ်စစ်ကဏ္ဍပူးပေါင်းဆောင်ရွက်ရေးဆိုင်ရာ နား လည်မှုစာချွန်လွှာ လက်မှတ်ရေးထိုးပွဲသို့  တက်ရောက်ခဲ့သည်။ ယင်းလက်မှတ်ရေးထိုးပွဲ တွင် INTER RAO-Export LLC ၏ General Director ဖြစ်သူ Mr. Maxim E. Sergeev က ကုမ္ပဏီအနေဖြင့် နိုင်ငံတကာတွင် လျှပ်စစ်ဓာတ်အားပေးစက်ရုံများအတွက် ပစ္စည်းတင် သွင်းမှု၊တည်ဆောက်မှုလုပ်ငန်းများအကြောင်း ရှင်းလင်းတင်ပြပြီး မြန်မာနိုင်ငံတွင် လျှပ်စစ် စီမံကိန်းများ ပူးပေါင်းဆောင်ရွက်မည့် ကိစ္စရပ်များကို ဆွေးနွေးခဲ့သည်။

ထို့နောက် လျှပ်စစ်စွမ်းအားဝန်ကြီးဌာနနှင့် စွမ်းအင်ဝန်ကြီးဌာန၊  ပြည်ထောင်စု ဝန်ကြီးနှင့်အဖွဲ့သည် ရုရှားဖက်ဒရေးရှင်းနိုင်ငံ၏ ဒုတိယဝန်ကြီးချုပ်နှင့်စွမ်းအင်ဝန်ကြီးဖြစ်သူ H.E. Mr. SHULGINOV Nikolay ဦးဆောင်သောအဖွဲ့နှင့် ‌တွေ့ဆုံဆွေးနွေးခဲ့ပါသည်။ ယင်းသို့တွေ့ဆုံရာ တွင် ရုရှားနိုင်ငံစွမ်းအင်ဝန်ကြီးဌာန၊ ဒုတိယဝန်ကြီး Mr. SOROKIN Pavel လည်း ပါဝင်တက် ရောက်ခဲ့ပြီး Mr. SHULGINOV Nikolay က ရုရှားနိုင်ငံအနေဖြင့် မြန်မာနိုင်ငံနှင့် စွမ်းအင်ဆိုင်ရာ ကိစ္စရပ်များတွင် ပိုမိုပူးပေါင်းဆောင်ရွက်နိုင်ရန် မျှော်လင့်ကြောင်း၊ ရေနံရှာဖွေတူးဖော်ရေးလုပ်ငန်း များ၌ ရုရှားကုမ္ပဏီများ ပါဝင်ဆောင်ရွက်နေမှုများနှင့် ရေနံနှင့်ရေနံထွက်ပစ္စည်းများ တင်ပို့ရေးနှင့် လျှပ်စစ်ဓာတ်အားပေးစက်ရုံတည်ဆောက်ရေးဆိုင်ရာ ကိစ္စရပ်များကို ဆွေးနွေးခဲ့ပါသည်။ ပြည်ထောင်စုဝန်ကြီးကလည်း မြန်မာနိုင်ငံအတွက် စက်သုံးဆီနှင့် လျှပ်စစ်ဓာတ်အား လိုအပ်ချက်များ ကိုရှင်းလင်းပြောကြား၍ ရုရှားနိုင်ငံနှင့် ရေရှည်ပူးပေါင်းဆောင်ရွက်ရေးကိစ္စများနှင့်စပ်လျဉ်းပြီး ဆွေးနွေးခဲ့သည်။ အဆိုပါကိစ္စနှင့်စပ်လျဉ်း၍ နှစ်နိုင်ငံဝန်ကြီးဌာနများအကြား ပူးပေါင်းလုပ်ငန်းအဖွဲ့များ ဖွဲ့စည်း၍ လက်တွေ့လုပ်ငန်းဆောင်ရွက်ရန် သဘောတူ ဆွေးနွေးခဲ့ပါသည်။

မွန်းလွဲပိုင်းတွင် ပြည်ထောင်စုဝန်ကြီးများသည် ဖိုရမ်၏ စုံညီအစည်းအဝေးသို့ တက် ရောက်ခဲ့သည်။ အဆိုပါ စုံညီအစည်းအဝေးသို့ ရုရှားဖက်ဒရေးရှင်းနိုင်ငံ၊ သမ္မတ မစ္စတာ ပလာဒီမာပူတင် တက်ရောက်၍ ကမ္ဘာ့စီးပွားရေးဆိုင်ရာကိစ္စရပ်များ၊ ရုရှားနိုင်ငံ၏ စီမံ ဆောင်ရွက်နေမှုများ၊ ပထဝီနိုင်ငံရေးဆိုင်ရာကိစ္စရပ်များ၊ ရုရှားစီးပွားရေးအခြေအနေ၊ စီမံ ကိန်းများအတွက် ငွေကြေးထုတ်ချေးမည့် ကိစ္စရပ်များ၊ စီးပွားရေး ပိတ်ဆို့မှုများ၊ မေခရို စီးပွားရေးတည်ငြိမ်ရေးနှင့်စပ်လျဉ်း၍ ဆောင်ရွက်နေမှုများ၊ စိန်ခေါ်မှုများမှ အခွင့်အလမ်း သို့ ပြောင်းလဲဆောင်ရွက်မှုများ၊ သိပ္ပံနှင့်နည်းပညာ ဖွံ့ဖြိုးတိုးတက်ရေး၊ ဒီဂျစ်တယ် ဖွံ့ဖြိုး တိုးတက်မှုနှင့် လူမှုလုံခြုံစိတ်ချရေး၊ ခေတ်သစ်ပုံစံဖြင့် ဈေးကွက်ဖွင့်လှစ် ဆောင်ရွက်ရေး ၊ နိုင်ငံအဆင့် အသေးစား၊ အလတ်စားလုပ်ငန်းများ ဖွံ့ဖြိုးတိုးတက်ရေးနှင့် ဝန်ဆောင်မှု တိုးမြှင့်နိုင်ရေးတို့နှင့်စပ်လျဉ်း၍ အကျယ်တဝင့် ထည့်သွင်း ပြောကြားခဲ့ပါသည်။

ဖိုရမ်ကာလအတွင်း မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌ ဒေါ်သန်းသန်းဆွေ သည် Bank of Russia မှ ဒုတိယဥက္ကဋ္ဌဖြစ်သူ Ms. Olga Skorobogatova နှင့် တွေ့ဆုံ၍ မြန်မာနိုင်ငံတော်ဗဟိုဘဏ်နှင့် Bank of Russia တို့အကြား နှစ်ဖက်ပူးပေါင်းဆောင်ရွက် ရေးစာချွန်လွှာ (Bilateral Cooperation MoU) ရေးထိုးရန် ကိစ္စရပ်များနှင့် ဘဏ်လုပ်ငန်း ဆိုင်ရာကိစ္စရပ်များနှင့်စပ်လျဉ်း၍ ဆွေးနွေးခဲ့သည်။ ထို့နောက် ရုရှားနိုင်ငံ၏ National Payment Card System ကို အကောင်အထည်ဖော်ဆောင်ရွက်ပေးသော MIR မှ CEO ဖြစ်သူ Mr. Vladimir Komlev နှင့် တွေ့ဆုံပြီး နှစ်နိုင်ငံကြား ခရီးသွားကဏ္ဍတွင် ဒေသတွင်း နှစ်နိုင်ငံငွေကြေးသုံးစွဲနိုင်ရေးနှင့်စပ်လျဉ်း၍ ပူးပေါင်းဆောင်ရွက်မှု အစီအစဉ်များကို ဆွေးနွေးခဲ့သည်။

ဖိုရမ်၏ စတုတ္ထနေ့ဖြစ်သည့် ဇွန်လ ၁၈ ရက်နေ့တွင် မြန်မာကိုယ်စားလှယ်အဖွဲ့သည် ဖိုရမ်၌ပြသထားသည့်ပြခန်းများကိုလေ့လာ၍ စီးပွားရေးဆောင်ရွက်ရန် စိတ်ပါဝင်စားသည့် ပုဂ္ဂလိက ရင်းနှီးမြှုပ်နှံသူများနှင့် ဆွေးနွေးခဲ့သည်။

စိန့်ပီတာစဘတ်နိုင်ငံတကာစီးပွားရေးဖိုရမ်သည် နိုင်ငံတကာ ဦးဆောင်အဖွဲ့အစည်း အဖြစ် ကမ္ဘာ့စီးပွားရေးအခြေအနေနှင့်  ရေရှည်တည်တံ့သည့် ဖွံ့ဖြိုးမှုကို ရရှိစေရေးအတွက် လက်တွေ့ဆောင်ရွက်နေမှုများကို အမြင်ချင်းဖလှယ်၍ ဆွေးနွေးသည့် ဖိုရမ်တစ်ခုဖြစ်ပါ သည်။ ၁၉၉၇ ခုနှစ်ကတည်းက စတင်ကျင်းပခဲ့ရာ ၂၀၀၅ ခုနှစ်မှ စတင်၍ ရုရှားဖက်ဒရေး ရှင်းသမ္မတ၏ ကြီးကြပ်မှုအောက်တွင် ကျင်းပခဲ့ပြီး၊ ရုရှားဖက်ဒရေးရှင်းသမ္မတသည် ဖိုရမ် သို့ နှစ်စဉ်တက်ရောက်ခဲ့သည်။ ဖိုရမ်သည် ရုရှားဖက်ဒရေးရှင်းနိုင်ငံနှင့် ထွန်းသစ်စနိုင်ငံ များ၏ ကမ္ဘာ့စီးပွားရေးဈေးကွက်များ၌ကြုံတွေ့ရသည့်  စီးပွားရေးဆိုင်ရာ အခွင့်အလမ်း များနှင့်စိန်ခေါ်မှုများကို စီးပွားရေးအဖွဲ့အစည်းများအကြား ဆွေးနွေးနိုင်သည့် လမ်းကြောင်း တစ်ခုအဖြစ် ရောက်ရှိခဲ့သည်။

ယခုကျင်းပသောဖိုရမ်သို့ ကာဇက်စတန်နိုင်ငံ၊ သမ္မတက ကိုယ်တိုင် တက်ရောက်ပြီး တရုတ်ပြည်သူ့သမ္မတနိုင်ငံ၊ သမ္မတနှင့် အီဂျစ်နိုင်ငံ၊ သမ္မတတို့က online  မှတစ်ဆင့် ပါဝင် တက်ရောက်၍ မိန့်ခွန်းပြောကြားခဲ့သည်။ ထို့ပြင် နိုင်ငံ ၄၃ နိုင်ငံမှ ဝန်ကြီးများ၊ ၈၄ နိုင်ငံမှ သံတမန်အကြီးအကဲများနှင့် နိုင်ငံနှင့် အုပ်ချုပ်မှုဒေသပေါင်း ၁၄၀ ကျော်တို့မှ ကိုယ်စား လှယ်များလည်း ပါဝင်တက်ရောက်ကြောင်း သတင်းရရှိသည်။