(၃၅) ကြိမ်မြောက် အာဆီယံအရင်းအနှီးဈေးကွက်ဥက္ကဌများအစည်းအဝေးသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး တက်ရောက်

(၃၅) ကြိမ်မြောက် အာဆီယံအရင်းအနှီးဈေးကွက် ဥက္ကဌများအစည်းအဝေး (35th Chairs’ Meeting of the ASEAN Capital Markets Forum) ကို နံနက် (၇:၃၀) နာရီတွင် Video Conference စနစ်ဖြင့်ကျင်းပရာ အိမ်ရှင်အဖြစ်လက်ခံကျင်းပသည့်ဘရူနိုင်းနိုင်ငံ၏ ဖိတ်ကြားချက်အရ မြန်မာနိုင်ငံမှ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးနှင့် ငွေချေးသက်သေခံလက်မှတ် လုပ်ငန်းကြီးကြပ်ရေးကော်မရှင်၊ ဥက္ကဋ္ဌ ဦးမောင်မောင်ဝင်း၊ ကော်မရှင်အဖွဲ့ဝင်များနှင့် ငွေချေးသက်သေခံလက်မှတ် လုပ်ငန်းကြီးကြပ်ရေးကော်မရှင်ရုံးမှ ညွန်ကြားရေးမှုးချုပ်တို့ ပါဝင်တက်ရောက်ခဲ့သည်။

အစည်းအဝေးတွင် အာဆီယံအရင်းအနှီးဈေးကွက်ဖိုရမ်၏ အလှည့်ကျဥက္ကဋ္ဌဖြစ်သော ဘရူနိုင်းနိုင်ငံ၊ ငွေကြေးအာဏာပိုင်အဖွဲ့၏ Deputy Managing Director ဖြစ်သူ Ms. Rashidah SABTU က သဘာပတိအဖြစ် ဆောင်ရွက်ပြီး အာဆီယံဒေသတွင်းနိုင်ငံများ၏ အရင်းအနှီးဈေးကွက် ကြီးကြပ်ရေးကော်မရှင်များမှ အကြီးအကဲများ၊ အာဆီယံအတွင်းရေးမှူးချုပ်ရုံးမှ ကိုယ်စားလှယ်များနှင့် အာရှဖွံ့ဖြိုးရေးဘဏ်မှ ကိုယ်စားလှယ်များ စုစုပေါင်း (၅၀) ဦးခန့် တက်ရောက်ပါသည်။

အစည်းအဝေးတွင် အာဆီယံဒေသတွင်း အရင်းအနှီးဈေးကွက်များ ဖွံ့ဖြိုးတိုးတက်ရေး အတွက် ပူးတွဲဖွဲ့စည်းထူထောင်ခဲ့သည့် အာဆီယံအရင်းအနှီးဈေးကွက်ဖွံ့ဖြိုးတိုးတက်ရေးလုပ်ငန်းအဖွဲ့နှင့် အာဆီယံ အရင်းအနှီးဈေးကွက်များဖိုရမ်တို့ ပူးပေါင်းဆောင်ရွက်လျက်ရှိသည့် အာဆီယံ ရေရှည်တည်တံ့ခိုင်မြဲသောဘဏ္ဍာရေး (ASEAN Sustainable Finance) ဆိုင်ရာ အကောင်အထည်ဖော်ဆောင်ရွက်နေမှုများ၊ အရင်းအနှီးဈေးကွက် အသွင်ကူးပြောင်းခြင်းဆိုင်ရာစံသတ်မှတ်ချက်များ၊ ကာလရှည်ငွေချေးစာချုပ် (Sustainability-Linked Bond) များထုတ်ဝေခြင်းဆိုင်ရာ စံသတ်မှတ်ချက်များ၊ အာဆီယံကော်ပိုရေးရှင်းများ၏ စဉ်ဆက်မပြတ်ဖွင့်ဟထုတ်ဖော်မှုဆိုင်ရာ စံသတ်မှတ်ချက်လုပ်ငန်းစဉ်များနှင့် အာရှဖွံ့ဖြိုးရေးဘဏ်မှ အာဆီယံအရင်းအနှီးဈေးကွက်များ ဖွံ့ဖြိုးတိုးတက်ရေးအတွက် နည်းပညာဆိုင်ရာအကူအညီပေးမှုကိစ္စရပ်များအပေါ် အစည်းအဝေး အစီအစဉ်အလိုက်ဆွေးနွေးခဲ့ကြပါသည်။

အစည်းအဝေးတွင် ဒုတိယဝန်ကြီး ဦးမောင်မောင်ဝင်းက အစည်းအဝေးအစီအစဉ်များအလိုက် ပါဝင်ဆွေးနွေးရာတွင် မြန်မာနိုင်ငံ၏ အရင်းအနှီးဈေးကွက်ဖွံ့ဖြိုးတိုးတက်ရေး ဆောင်ရွက်နေမှုအခြေအနေများ၊ ရေရှည်တည်တံ့ခိုင်မြဲသောဘဏ္ဍာရေးစနစ်ဖြစ်ပေါ်ရေး၊ အာဆီယံအရင်းအနှီး ဈေးကွက်ဖွံ့ဖြိုးတိုးတက်ရေးမျှော်မှန်းချက်ကို အကောင်အထည်ဖော်ရာတွင် လိုက်ပါဆောင်ရွက်နိုင်မှုများကို ပါဝင်ဆွေးနွေးခဲ့ပြီး၊ အာရှဖွံ့ဖြိုးရေးဘဏ်မှ မြန်မာနိုင်ငံသို့ အရင်းအနှီးဈေးကွက်ဖွံ့ဖြိုး တိုးတက်ရေးနည်းပညာအကူအညီပေးအပ်မှုများအတွက် ကျေးဇူးတင်ရှိကြောင်း ပြောကြားခဲ့သည်။ အစည်းအဝေးတွင် ASEAN Collective Investment Schemes (ASEAN CIS) အတွက် ပြန်လည် ပြင်ဆင်ထားသည့် လက်စွဲစာအုပ်နှင့် ASEAN Corporate Governance Scorecard (ACGS) Country Report ကို ထုတ်ဝေနိုင်ခဲ့ကြောင်း သိရှိရသည်။

ထို့အပြင် ACMF, Insurance Regulators’ Meeting (AIRM), Senior Level Committee on Financial Integration (SLC) နှင့် အာဆီယံ အရင်းအနှီးစျေးကွက် ဖွံ့ဖြိုးတိုးတက်ရေး လုပ်ငန်းအဖွဲ့ (WC-CMD)တို့ ပူးပေါင်း၍ ASEAN အတွက် ရေရှည်တည်တံ့သော ဘဏ္ဍာရေး Taxonomy ကို ရေးဆွဲရေးအတွက် ASEAN  Taxonomy Board ကို ဖွဲစည်းနိုင်ခဲ့ပြီး Board အတွက် အခြေခံမူများကို ချမှတ်နိုင်ခဲ့သည်။ 

အစည်းအဝေးတွင် ACMF Vision 2025 အဖြစ် ၂၀၂၁ ခုနှစ်မှ ၂၀၂၅ ခုနှစ်အတွင်း ACMF Action Plan (2021-2025) တွင်ဖော်ပြထားသည့် ဦးစားပေးဆောင်ရွက်မည့် လုပ်ငန်းနယ်ပယ် များဖြစ်သော အရင်းအနှီးဈေးကွက်ဖွံ့ဖြိုးမှုဆိုင်ရာ သတင်းအချက်အလက်များကို ပွင့်လင်းမြင်သာမှုဖော်ဆောင်ရေး၊ အာဆီယံဒေသတွင်း နယ်စပ်ဖြတ်ကျော်ရင်းနှီးမြှုပ်နှံမှုဆိုင်ရာလုပ်ထုံးလုပ်နည်းများ ဆက်လက်အကောင်အထည်ဖော်ဆောင်ရွက်ရေး၊ ဒေသတွင်းအရင်းအနှီးဈေးကွက်များ တစ်ခုနှင့်တစ်ခုအပြန်အလှန်ချိတ်ဆက်ဆောင်ရွက်ရေး၊ ဒေသတွင်းအရင်းအနှီးဈေးကွက်များ ဖွံ့ဖြိုးတိုးတက်လာရေးအတွက် ပိုမိုပူးပေါင်းဆောင်ရွက်ရေး လုပ်ငန်းနယ်ပယ်များကို သဘောတူခဲ့ကြသည်။ ထို့နောက် ယခုနှစ်အတွက် ACMF အလှည့်ကျဥက္ကဋ္ဌတာဝန်ကို ထမ်းဆောင်နေသည့် ဘရူနိုင်းနိုင်ငံ၊ ဗဟိုဘဏ်မှ လာမည့်နှစ်အတွက် ACMF အလှည့်ကျဥက္ကဌဖြစ်သူ ကမ္ဘောဒီးယားနိုင်ငံ Securities and Exchange Regulator of Combodia သို့ လွှဲပြောင်း တာဝန်ပေးအပ်ခဲ့ကြောင်း သိရသည်။  

အဆိုပါအစည်းအဝေးမှ ညှိနှိုင်းသဘောတူညီပြီးဖြစ်သည့် လုပ်ငန်းစဉ်များကို ယခုလကုန်တွင် ကျင်းပပြုလုပ်မည့် အာဆီယံဘဏ္ဍာရေး ဝန်ကြီးများအစည်းအဝေးသို့ ဆက်လက်တင်ပြမည်ဖြစ်ပါသည်။ အာဆီယံအရင်းအနှီးဈေးကွက်များဖိုရမ်သည် အာဆီယံဒေသတွင်း အရင်းအနှီးဈေးကွက်များ ဖွံ့ဖြိုးတိုးတက်လာရေးအတွက် အာဆီယံနိုင်ငံများမှ အရင်းအနှီးဈေးကွက် စည်းမျဉ်းစည်းကမ်းထိန်းကျောင်းသူ အဖွဲ့အစည်းအကြီးအကဲများ၏ အဆင့်မြင့်ဆွေးနွေးပွဲတစ်ခုဖြစ်ပြီး နှစ်စဉ် ပုံမှန်ကျင်းပလေ့ရှိသော အစည်းအဝေးဖြစ်ကြောင်းသိရသည်။

သတင်းစဉ်

 

AttachmentSize
PDF icon 1543581.pdf494.07 KB