(၃၆) ကြိမ်မြောက် အာဆီယံအရင်းအနှီးဈေးကွက် ဥက္ကဌများအစည်းအဝေးသို့ မြန်မာကိုယ်စားလှယ်အဖွဲ့တက်ရောက်

(၃၆) ကြိမ်မြောက် အာဆီယံအရင်းအနှီးဈေးကွက် ဥက္ကဌများအစည်းအဝေး (36th Chairs-Meeting of the ASEAN Capital Markets Forum) ကို ၂၀၂၂ ခုနှစ်၊ မတ်လ ၁၇ ရက်နေ့၊ နေ့လယ် (၁၂:၃၀) နာရီတွင် Virtual စနစ်ဖြင့် ကျင်းပရာ မြန်မာနိုင်ငံမှ စီမံကိန်းနှင့်ဘဏ္ဍာရေးဝန်ကြီးဌာန၊
ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် အတွင်းရေးမှူး၊ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်ရုံး ညွှန်ကြားရေးမှူးချုပ် ဦးကြည်ဇင်ထွန်း၊ ညွှန်ကြားရေးမှူးများဖြစ်ကြသည့် ဒေါ်ကြည်ကြည်ခင်ဆွေ နှင့် ဦးဆန်းဝင်းတို့ပါဝင်သည့် မြန်မာကိုယ်စားလှယ်
အဖွဲ့ တက်ရောက်ခဲ့ပါသည်။

အစည်းအဝေးတွင် ၂၀၂၂ ခုနှစ် အာဆီယံအရင်းအနှီးဈေးကွက်ဖိုရမ်၏ အလှည့်ကျဥက္ကဌဖြစ်သော ကမ္ဘောဒီးယားနိုင်ငံ၊ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် ၊ ဥက္ကဌ H.E. Mr Sou Socheat က သဘာပတိအဖြစ် ဆောင်ရွက်ပြီး အာဆီယံဒေသတွင်းနိုင်ငံများ၏ အရင်းအနှီးဈေးကွက်ကြီးကြပ်ရေးကော်မရှင်များမှ ဥက္ကဌများ၊ အတွင်းရေးမှူးများ၊ အာဆီယံအတွင်းရေးမှူးချုပ်ရုံးမှ ကိုယ်စားလှယ်များနှင့် အာရှဖွံ့ဖြိုးရေးဘဏ်မှ ကိုယ်စားလှယ်များ စုစုပေါင်း (၅၀) ဦးခန့် တက်ရောက်သည်။

အစည်းအဝေးတွင် အာဆီယံစုပေါင်းရင်းနှီးမြှုပ်နှံမှုအစီအစဉ်အတွက် ဝက်ဘ်ဆိုက်သစ်ဆောင်ရွက်ထားရှိမှု၊ အာဆီယံရန်ပုံငွေအဖွဲ့အစည်းများ၏ တာဝန်ခံမှုရှိသည့် စဉ်ဆက်မပြတ်ဖွင့်ဟထုတ်ဖော်မှုဆိုင်ရာ စံသတ်မှတ်ချက်များ တပြေးညီပြဌာန်းနိုင်ရေးလုပ်ငန်းစဉ်များ၊ အာဆီယံဒေသတွင်း အရင်းအနှီးဈေးကွက်ဆိုင်ရာ ကျွမ်းကျင်ပညာရှင်များအား ACMF Pass ဖြင့် ခွင့်ပြုခဲ့သည့် အခြေအနေများ၊ အာဆီယံအရင်းအနှီးဈေးကွက်ဖွံ့ဖြိုးတိုးတက်ရေးလုပ်ငန်းအဖွဲ့နှင့် အာဆီယံအရင်းအနှီးဈေးကွက်များဖိုရမ်တို့ ပူးပေါင်းဆောင်ရွက်လျက်ရှိသည့် အာဆီယံဘဏ္ဍာရေးဆိုင်ရာ ဆောင်ရွက်ချက်များကို အကောင်အထည်ဖော်ဆောင်ရွက်နေမှုများ၊ အရင်းအနှီးဈေးကွက် အသွင်ကူးပြောင်းခြင်းဆိုင်ရာ စံသတ်မှတ်ချက်များ၊ ကာလရှည်ငွေချေးစာချုပ် (Sustainability-Linked Bond) များ ထုတ်ဝေခြင်းဆိုင်ရာစံသတ်မှတ်ချက်များ၊ အာဆီယံဒေသရှိ စာရင်းဝင်ကုမ္ပဏီများ၏ ကော်ပိုရိတ်စီမံအုပ်ချုပ်မှုဆိုင်ရာ အကဲဖြတ်အစီအစဉ် ၊ OECD ၏ ပူးပေါင်းဆောင်ရွက်မှုအစီအစဉ်နှင့် Terms of Reference ရေးဆွဲမှုအစီအစဉ်များ၊ အာဆီယံဝက်ဘ်ဆိုက်ထိန်းသိမ်းစရိတ်နှင့် ဘက်စုံနားလည်မှုစာချွန်လွှာရေးထိုးရေးအစီအစဉ်များ၊ အာရှဖွံ့ဖြိုးရေးဘဏ်မှ အာဆီယံအရင်းအနှီးဈေးကွက်များ ဖွံ့ဖြိုးတိုးတက်ရေးအတွက် နည်းပညာဆိုင်ရာအကူအညီပေးမှုများကို ဆွေးနွေးခဲ့ကြသည်။

ထို့ပြင် ACMF , Insurance Regulators-Meeting (AIRM), Senior Level Committee on Financial Integration (SLC) နှင့် အာဆီယံအရင်းအနှီးဈေးကွက် ဖွံ့ဖြိုးတိုးတက်ရေးလုပ်ငန်းအဖွဲ့ (WC-CMD) တို့ ပူးပေါင်းဖွဲ့စည်းထားသည့် ASEAN Taxonomy Board မှ ရေးဆွဲခဲ့သည့် Version 1 of ASEAN Taxonomy for Sustainable Finance အပေါ် ထပ်မံမွမ်းမံရေးဆွဲမည့် အစီအစဉ်များကိုဆွေးနွေးခဲ့ကြသည်။

အစည်းအဝေးမှ ACMF Vision 2025 အဖြစ် ၂၀၂၁ ခုနှစ်မှ ၂၀၂၅ ခုနှစ်အတွင်း ACMF Action Plan (2021-2025) အရ ဦးစားပေးဆောင်ရွက်မည့် လုပ်ငန်းနယ်ပယ်များဖြစ်သော အရင်းအနှီးဈေးကွက်တိုးတက်မှုဆိုင်ရာ သတင်းအချက်အလက်များကို ပွင့်လင်းမြင်သာမှုဖော်ဆောင်ရေး၊ အာဆီယံဒေသတွင်းနယ်စပ်ဖြတ်ကျော် ရင်းနှီးမြှုပ်နှံမှုဆိုင်ရာလုပ်ထုံးလုပ်နည်းများ ဆက်လက်အကောင်အထည်ဖော်ဆောင်ရွက်ရေး၊ ဒေသတွင်းအရင်းအနှီးဈေးကွက်များ တစ်ခုနှင့်တစ်ခုအပြန်အလှန်ချိတ်ဆက်ဆောင်ရွက်ရေး၊ ဒေသတွင်းအရင်းအနှီးဈေးကွက်များဖွံ့ဖြိုးတိုးတက်လာရေးအတွက် ပိုမိုပူးပေါင်းဆောင်ရွက်ရေးလုပ်ငန်းနယ်ပယ်များကို ရင်းနှီးပွင့်လင်းစွာ အမြင်ချင်းဖလှယ်ခဲ့ကြကြောင်းသိရှိရပါသည်။