ရန်ကုန်တိုင်းဒေသကြီး၊ စာရင်းအင်းဥပဒေ၊ နည်းဥပဒေများ အသိပညာ မြှင့်တင်ရေး ဆွေးနွေးပွဲ

ရန်ကုန်တိုင်းဒေသကြီးအစိုးရအဖွဲ့ရုံး ဝန်ကြီးချုပ် ဦးလှစိုးသည် ၂၀၂၂ ခုနှစ်၊ ဇန်နဝါရီလ(၂၆)ရက်နေ့ နံနက်(၁၀:၀၀)နာရီတွင်  စာရင်းဥပဒေ၊ နည်းဥပဒေများ အသိပညာမြှင့်တင်ရေး ဆွေးနွေးပွဲသို့ တက်ရောက်၍ အမှာစကားပြောကြားခဲ့ပါသည်။

ဆွေးနွေးပွဲသို့ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးလှစိုး၊ စီးပွားရေးရာဝန်ကြီး ဦးအောင်သန်းဦး၊ လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးဝင်းတင့်၊ စည်ပင်သာယာရေးဝန်ကြီး ဦးဗိုလ်ဌေး၊ လူမှုရေးဝန်ကြီး၊ ဦးအောင်ဝင်းသိန်း၊ လမ်းပန်းဆက်သွယ်ရေးဝန်ကြီး၊ ရဲမှူးချုပ် မျိုးမင်းထိုက်၊ တိုင်းရင်းသားလူမျိုးရေးရာဝန်ကြီး ဦးစောဂျက်ကော့ထူး၊ ဗဟိုစာရင်းအင်းအဖွဲ့မှ ညွှန်ကြားရေးမှူးချုပ်နှင့် တာဝန်ရှိသူများ၊ ဌာနဆိုင်ရာအသီးသီးမှ အရာထမ်းများ တက်ရောက်ခဲ့ကြပါသည်။

ဆွေးနွေးပွဲတွင် ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးလှစိုးက အမှာစကားပြောကြားရာတွင်  ဗဟိုစာရင်းအင်းအဖွဲ့က ပြဋ္ဌာန်းခဲ့သည့် စာရင်းအင်းဥပဒေနှင့် စာရင်းအင်းနည်းဥပဒေများ သက်ဝင်ကျင့်သုံးလာစေရေး၊ အမျိုးသားစာရင်းအင်းစနစ်တွင်ပါဝင်သည့် သက်ဆိုင်ရာဌာနများနှင့် ပုဂ္ဂလိကလုပ်ငန်းရှင်များ အကြား ကျယ်ကျယ်ပြန့်ပြန့် သိရှိနားလည်လာစေရေးနှင့် ဥပဒေနှင့်အညီ ဆောင်ရွက် နိုင်စေရေးတို့ကို ရည်ရွယ်၍ စာရင်းအင်းဥပဒေ၊ နည်းဥပဒေ များ အသိပညာမြှင့်တင်ရေး ဆွေးနွေးပွဲကို  ကျင်းပရခြင်းဖြစ်ပါကြောင်း၊

နိုင်ငံတစ်နိုင်ငံ ဖွံ့ဖြိုး တိုးတက်ရန်အတွက် နိုင်ငံ၏အမျိုးသားစာရင်းအင်းစနစ် ခိုင်မာအားကောင်းဖို့ လိုအပ်ပါကြောင်း၊ အမျိုးသားစာရင်းအင်းစနစ် ခိုင်မာအားကောင်း ပြီး ပြည့်စုံမှန်ကန်သည့် စာရင်းအင်းအချက်အလက်များရရှိမှသာ နိုင်ငံအတွက် မူဝါဒ များနှင့် စီမံကိန်းများရေးဆွဲရာမှာ လည်းကောင်း၊ သယံဇာတများ ခွဲဝေအသုံးပြုရာမှာလည်းကောင်း၊ သုတေသနနှင့် ဖွံ့ဖြိုးရေးလုပ်ငန်းများ ဆောင်ရွက်ရာမှာလည်းကောင်း ထိရောက်စွာ အထောက်အကူပြုနိုင်မှာ ဖြစ်ပါကြောင်း၊

တိကျမှန်ကန်ပြီး မြေပြင်အခြေအနေနှင့် ကိုက်ညီမှုရှိသော စာရင်းအင်း အချက်အလက်များကို မူဝါဒချမှတ်သူများသာမက စီးပွားရေးလုပ်ငန်းရှင်များအတွက်လည်း လိုအပ်ပါကြောင်း၊ စာရင်းအင်းအချက်အလက်တွေပေါ် အခြေခံပြီး ရင်းနှီးမြှုပ်နှံမှုများကို ဆောင်ရွက်ခြင်းဖြင့် အကျိုးအမြတ်ရရှိနိုင်မှု၊ စွန့်စားရမှု(Risk)တို့ကို ကြိုတင်ခန့်မှန်းတွက်ချက်နိုင်မှာဖြစ်ပါကြောင်း၊       

စာရင်းအင်းဥပဒေကို ၂၀၁၈ခုနှစ်မှာ ပြည်ထောင်စုလွှတ်တော် ဥပဒေအမှတ်(၁)နဲ့ အသစ်ရေးဆွဲပြဋ္ဌာန်းခဲ့ပါကြောင်း၊ စာရင်းအင်းဥပဒေအရ အပ်နှင်းထားသည့် လုပ်ပိုင်ခွင့်ကို ကျင့်သုံး၍ စီမံကိန်းနှင့်ဘဏ္ဍာရေးဝန်ကြီးဌာနက စာရင်းအင်းနည်းဥပဒေ ကို ၂၀၂၁ ခုနှစ်၊ မေလမှာ ထုတ်ပြန်ခဲ့ပါကြောင်း၊

ဗဟိုစာရင်းအင်းအဖွဲ့သည် စာရင်းအင်းဥပဒေ၊ နည်းဥပဒေများတွင် ပြဋ္ဌာန်းထားသည့်အတိုင်း မြန်မာနိုင်ငံ၏ တရားဝင်စာရင်းအင်းများ ပြုစုတွက်ချက် ထုတ်ပြန်ရာ၌  လိုက်နာရမည့် အခြေခံစည်းမျဉ်းများနှင့်အညီ ဆောင်ရွက်ခြင်း၊ အမျိုးသားစာရင်းအင်းစနစ် အရည်အသွေး ပြည့်ဝရေးအတွက် ပေါင်းစပ်ညှိနှိုင်းမှုယန္တရား (Coordination Mechanism)များ ဖွဲ့စည်းဆောင်ရွက်ခြင်း၊ သန်းခေါင်စာရင်းနှင့် စစ်တမ်းများကောက်ယူရာတွင် နည်းပညာအကူအညီနှင့် အကြံဉာဏ်များပေးခြင်း၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ (National Strategy for Development of Statistics – NSDS) ကို အကောင်အထည်ဖော်ခြင်း၊ နိုင်ငံ၏ တရားဝင်စာရင်းအင်းများ ထုတ်ပြန်ခြင်း၊ တရားဝင်စာရင်းအင်းများကို အားပေး မြှင့်တင်ခြင်းနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးတို့ကို သက်ဆိုင်ရာ အစိုးရဌာန၊ အဖွဲ့အစည်းအားလုံး၏ ပူးပေါင်းပါဝင်မှုနှင့်အတူ ဆောင်ရွက်လျက် ရှိပါကြောင်း၊

စာရင်းအင်းဥပဒေတွင် ပူးပေါင်းဆောင်ရွက်ရေးယန္တရားကို တိတိကျကျ ရေးဆွဲပြဋ္ဌာန်းထားသည့်အတွက် အစိုးရဌာနများအနေဖြင့်  ဗဟိုစာရင်းအင်းအဖွဲ့က တောင်းခံလာသည့် စာရင်းအင်းအချက်အလက်များကို ပံ့ပိုးပေးရန်နှင့်  ဌာနဆိုင်ရာများအနေဖြင့် စာရင်းအင်းလုပ်ငန်းများဆောင်ရွက်ရာတွင်  ဗဟိုစာရင်းအင်းအဖွဲ့နှင့်အတူ တက်တက်ကြွကြွ ပူးပေါင်းဆောင်ရွက်ပေးကြရန် တိုက်တွန်း ပြောကြားခဲ့ပါသည်။

ထို့နောက် ရန်ကုန်တိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်သန်းဦးက ၂၀၁၅ ခုနှစ်မှစ၍ စာရင်းအင်းအချက်အလက်မှန်ကန်ရေးနဲ့ အရည်အသွေးပြည့်ဝရေး လုပ်ငန်းစဉ်များကို ကော်မတီဖွဲ့၍ ဆောင်ရွက်ခဲ့ပါကြောင်း၊ ၂၀၁၈ ခုနှစ်၊ စာရင်းအင်းဥပဒေ ပြဋ္ဌာန်းခဲ့သည့်အတွက် ကော်မတီကို ဥပဒေနှင့်အညီ အသစ်ပြန်လည်ဖွဲ့စည်းခဲ့ရာ  တိုင်းဒေသကြီးအဆင့် စာရင်းအင်း အချက်အလက် မှန်ကန်ရေးနဲ့ အရည်အသွေးပြည့်ဝရေးကော်မတီတွင် ဥက္ကဋ္ဌအဖြစ် တာဝန်ယူဆောင်ရွက် နေပါကြောင်း၊ လက်တွေ့ကျသည့် စီမံကိန်းများနှင့် မူဝါဒများ မှန်ကန်စွာချမှတ်နိုင်ရန်၊ ထိရောက်စွာအကောင်အထည်ဖော်နိုင်ရန်နှင့်  စောင့်ကြည့် သုံးသပ်ရန်၊ ဌာနဆိုင်ရာများ အကြား ထိရောက်စွာ ပူးပေါင်းဆောင်ရွက်နိုင်ရန်တို့ကို ရည်ရွယ်ပြီး ရန်ကုန်တိုင်း ဒေသကြီး စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေးကော်မတီ အစည်းအဝေး (၁/၂၀၂၁) ကို ၂၀၂၁ ခုနှစ်၊ ဒီဇင်ဘာလ ၂၉ ရက်နေ့မှာ ကျင်းပခဲ့ပါကြောင်း၊ အစည်းအဝေးတွင် ဌာနဆိုင်ရာအချင်းချင်းအကြား ပူးပေါင်းဆောင်ရွက်မှု အားကောင်းစေရေး၊ စာရင်းအင်းအချက်အလက်များ အချိန်မီပံ့ပိုးနိုင်ရေးနှင့် မြေပြင်စာရင်းအင်း အချက်အလက် ကွာဟမှုကို လျှော့ချရေး တို့ကို ဆွေးနွေးခဲ့ပါသည်။

အစည်းအဝေးသို့ တက်ရောက်လာကြသည့် ဌာနဆိုင်ရာများအနေဖြင့် စာရင်းအင်းလုပ်ငန်းများ ဆောင်ရွက်ရာတွင် ဗဟိုစာရင်းအင်းအဖွဲ့နှင့်အတူ တက်တက် ကြွကြွပူးပေါင်းဆောင်ရွက်ပေးကြရန်နှင့် စာရင်းအင်းဥပဒေ၊ နည်းဥပဒေများနှင့်အညီ ဆောင်ရွက်ပေးကြရန် တိုက်တွန်းပြောကြားခဲ့ပါသည်။

ထို့နောက် ဗဟိုစာရင်းအင်းအဖွဲ့  ညွှန်ကြားရေးမှူးချုပ် ဦးထွန်းဇော်က စာရင်းအင်းဥပဒေနှင့် နည်းဥပဒေများတွင် ပြဋ္ဌာန်းထားသည့် အကြောင်းအရာများနှင့် စပ်လျဉ်း၍ ရှင်းလင်းပြောကြားပြီး တက်ရောက်လာသည့် ဌာနဆိုင်ရာများမှ တာဝန်ရှိသူများက မေးမြန်းဆွေးနွေးခဲ့ကြပါသည်။

, , ,