“ကိန်းဂဏန်းအသုံးပြုသူများနှင့် တတိယအကြိမ် အလုပ်ရုံဆွေးနွေးပွဲ”ကျင်းပ Workshop on Third Data User Consultation for the Myanmar Living Conditions Survey (MLCS) 2017

, ,

          စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့သည်ကမ္ဘာ့ဘဏ်(World Bank)နှင့် ကုလသမဂ္ဂဖွံ့ဖြိုးမှုအစီအစဉ် (UNDP) တို့၏ ပံ့ပိုးကူညီမှုဖြင့် ပူးပေါင်းဆောင်ရွက်ခဲ့သည့် မြန်မာ နေထိုင်မှုအခြေအနေစစ်တမ်း(၂၀၁၇) (Myanmar Living Conditions Survey-MLCS) နှင့် ပတ်သက်၍ ကိန်းဂဏန်းအသုံးပြုသူများနှင့် တတိယအကြိမ်အလုပ်ရုံဆွေးနွေးပွဲ Workshop on Third Data User Consultation for the Myanmar Living Conditions Survey (MLCS) 2017 ကို ၂၀၁၈ ခုနှစ်၊ ဇန်နဝါရီလ (၂၉) ရက်၊ တနင်္လာနေ့နံနက် (၁၀း၃၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ရုံးအမှတ် (၃၂) အစည်းအဝေးခန်းမ၌ ကျင်းပခဲ့ပါသည်။

          ဆွေးနွေးပွဲသို့ သက်ဆိုင်ရာဦးစီးဌာနများမှ ညွှန်ကြားရေးမှူးချုပ်များ၊ ဒုတိယညွှန်ကြား ရေးမှူးချုပ်များ၊ ညွှန်ကြားရေးမှူးများ၊ ဖွံ့ဖြိုးမှုမိတ်ဖက်များ၊ ပြင်ပသုတေသနအဖွဲ့အစည်းများ၊ ဌာနဆိုင်ရာ အဖွဲ့အစည်းများ၊ NSDS Cluster အဖွဲ့ခေါင်းဆောင်များနှင့် တာဝန်ရှိသူများ အပါအဝင် စုစုပေါင်း (၁၅၀) ဦးခန့် တက်ရောက်ကြပါသည်။

          ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်၊ ဒေါက်တာဝါဝါမောင်မှ အဖွင့်အမှာစကား ပြောကြားရာတွင် အဆိုပါစစ်တမ်းကိုရည်ရွယ်ချက် (၃) ခုနှင့် ဆောင်ရွက်ခဲ့ပါကြောင်း၊ ပထမ အချက်မှာ တစ်နိုင်ငံလုံးအတိုင်းအတာဖြင့် ဆင်းရဲနွမ်းပါးမှုနှုန်းအပြင် တိုင်းဒေသကြီး/ ပြည်နယ် အလိုက် ဆင်းရဲနွမ်းပါးမှုနှင့် နိုင်ငံအတွင်း မညီမျှမှု အခြေအနေများကို လျှော့ချနိုင်ရန် ရည်ရွယ် ပါကြောင်း၊ ဒုတိယအချက်မှာ စဉ်ဆက်မပြတ်ဖွံ့ဖြိုးမှုပန်းတိုင်များ (Sustainable Develop-ment Goals_SDGs) အတွက် လိုအပ်သောညွှန်ကိန်း အနည်းဆုံး (၂၃) ခုကို ရရှိနိုင်ရန် ဖြစ်ပါကြောင်း၊ တတိယအချက်မှာ System of National Accounts (SNA-2008) နှင့် GDP တွက်ချက်ရာတွင် အထောက်အကူပြုနိုင်မည်ဖြစ်ပါကြောင်း၊ တစ်နှစ်တာကာလပတ်လုံး Quarter (၄) ခု ခွဲ၍ ကောက်ယူခဲ့သော မြန်မာနေထိုင်မှုအခြေအနေစစ်တမ်း (၂၀၁၇) မှာ ၂၀၁၇ ခုနှစ်၊ ဒီဇင်ဘာလလယ်တွင်ပြီးဆုံးခဲ့ပြီး စစ်တမ်းမှရရှိလာသော စာရင်းအင်းများကို စစ်ဆေးခြင်းနှင့် သုံးသပ်ခြင်းလုပ်ငန်းများ စတင်ပြုလုပ်နေပြီဖြစ်ပါကြောင်း၊ သက်ဆိုင်ရာဌာနများမှ အကြံပြု ချက်များအပေါ်မူတည်၍ ပထမအစီရင်ခံစာမူကြမ်းကို ၂၀၁၈ ခုနှစ်၊ မတ်လတွင် ထုတ်ပြန်နိုင် ရန်နှင့် လူမှုစီးပွားအခြေအနေများအား အသေးစိတ်ဖော်ပြထားသည့် ဒုတိယအစီရင်ခံစာကို ၂၀၁၈ ခုနှစ်၊ နိုဝင်ဘာလ/ ဒီဇင်ဘာလတွင် ထုတ်ပြန်မည်ဖြစ်ပါကြောင်း၊ သို့ဖြစ်ပါ၍ လူကြီးမင်းတို့အနေဖြင့် အစီရင်ခံစာ(၂)ခုအတွက် အကြံပြုချက်များအား ဆွေးနွေးပြောကြား ပေးစေလိုပါကြောင်း၊ လူကြီးမင်းတို့ ဆွေးနွေးပြောကြားသည့် အချက်အလက်များသည် ဗဟိုစာရင်းအင်းအဖွဲ့မှ ဆက်လက်ဆောင်ရွက်မည့် စိစစ်သုံးသပ်ချက်များပြုလုပ်ရာတွင် မိမိတို့ အနေဖြင့် စာရင်းအင်းထုတ်ပြန်သူနှင့် အသုံးပြုသူများအကြား ဆက်ဆံရေးကောင်းမွန်စေခြင်းမှ တဆင့် အသုံးဝင်သည့် စာရင်းအင်းအချက်အလက်များ ထုတ်ပြန်ရာတွင် ပိုမိုကောင်းမွန်၍ အသုံးတည့်စေရန်ဖြစ်ပါကြောင်း ပြောကြားခဲ့ပါသည်။

          ဆက်လက်၍ ဗဟိုစာရင်းအင်းအဖွဲ့မှလက်ထောက်ညွှန်ကြားရေးမှူး၊ ဒေါ်ခင်ဆက်ရည်နှင့် World Bank မှ စာရင်းအင်းပညာရှင် Mrs.Rachel Smith-Govoni တို့မှ ကိန်းဂဏန်းအချက် အလက်များကောက်ယူခြင်း၊ စိစစ်ခြင်းနှင့် လက်ရှိအချိန်ထိ ဆောင်ရွက်နေမှုများ (Outline of progress of MLCS -2017) နှင့် ပတ်သက်သည့် အကြောင်းအရာများအားလည်းကောင်း၊ ဆက်လက်၍ World Bankမှ စာရင်းအင်းပညာရှင်Mrs.Rachel Smith-Govoni နှင့် UNDP မှ Project Analyst - U Sa Sithu Htike San တို့မှ အဓိကညွှန်ကိန်းများ အစီရင်ခံစာတွင် ပါဝင်မည့်အကြောင်းအရာများ (Outline of Key Indicators Report Content) နှင့် ပတ်သက်သည့် အကြောင်းအရာများအားလည်းကောင်း၊ ဆက်လက်၍ ဗဟိုစာရင်းအင်းအဖွဲ့မှ လက်ထောက်ညွှန်ကြားရေးမှူး ဒေါ်ဖြူပြာထွန်းနှင့် World Bank မှ Senior Economist - Mrs. Reena Badiani-Magnusson တို့မှ လူမှုစီးပွားညွှန်ကိန်းများအစီရင်ခံစာ (Outline of Socio - Economic Report content)အား ရှင်းလင်းပြောကြားကာ တက်ရောက်လာသူများမှ မေးမြန်းဆွေးနွေးကြပြီး အလုပ်ရုံဆွေးနွေးပွဲကို ခေတ္တရပ်နားခဲ့ပါသည်။

          နေ့လည်ပိုင်းတွင် အလုပ်ရုံဆွေးနွေးပွဲကိုပြန်လည်ကျင်းပခဲ့ရာ တက်ရောက်လာသူများမှ မေးမြန်းဆွေးနွေးမှုများအား ညွှန်ကြားရေးမှူးချုပ် ဒေါက်တာဝါဝါမောင်၊ UNDP နှင့်World Bank တို့မှ တာဝန်ရှိသူများက ပြန်လည်ဖြေကြားခဲ့ပြီး အစည်းအဝေးအား ညနေ (၄:၀၀) နာရီတွင် ရုပ်သိမ်းခဲ့ပါသည်။

နေပြည်တော်၊ ဇန်နဝါရီလ ၂၉ ရက်

(သတင်းစဉ်)