ပြည်သူ့ဘဏ္ဍာရေးစီမံခန့်ခွဲမှုအထူးမွမ်းမံသင်တန်းအမှတ်စဉ် (၂) သင်တန်းဆင်းပွဲအခမ်းအနားကျင်းပခြင်း

နေပြည်တော်၊ ဇွန် ၃
“ပြည်သူ့ဘဏ္ဍာရေးစီမံခန့်ခွဲမှု အထူးမွမ်းမံသင်တန်းအမှတ်စဉ် (၂)” သင်တန်းဆင်းပွဲ အခမ်းအနားကို ၂၀၂၂ ခုနှစ်၊ ဇွန်လ ၃ ရက်နေ့၊ နေ့လယ် (၁၂:၀၀) နာရီတွင် စီမံကိန်းနှင့် ဘဏ္ဍာ ရေးဝန်ကြီးဌာန၊ ရသုံးမှန်းခြေငွေစာရင်းဦးစီးဌာန၊ ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း၌  ကျင်းပသည်။ သင်တန်းဆင်းပွဲအခမ်းအနားသို့ စီမံကိန်းနှင့် ဘဏ္ဍာရေးဝန်ကြီးဌာန ဒုတိယ ဝန်ကြီးများဖြစ်သော ဦးမောင်မောင်ဝင်းနှင့် ဒေါ်သန်းသန်းလင်း၊ ပြည်သူ့ဘဏ္ဍာရေးစီမံခန့်ခွဲမှု သင်တန်းကျောင်းစီမံခန့်ခွဲမှုအဖွဲ့ အဖွဲ့ဝင် ဌာနအကြီးအကဲများ၊ ဖိတ်ကြားထားသော ဧည့်သည် တော်များနှင့် ဗဟိုအဖွဲ့အစည်းများနှင့် ဝန်ကြီးဌာနအဖွဲ့အစည်း (၃၆) ခုမှ ညွှန်ကြားရေးမှူးအဆင့် သင်တန်းသားများ တက်ရောက်ကြသည်။ 
အခမ်းအနားတွင် ဒုတိယဝန်ကြီး ဦးမောင်မောင်ဝင်းက သင်တန်းဆင်း အမှာစကား ပြောကြားရာတွင် ဝန်ကြီးဌာန၊ အဖွဲ့အစည်းများအနေဖြင့် နှစ်စဉ် စီမံကိန်းရေးဆွဲခြင်းနှင့် ရသုံး ခန့်မှန်းခြေငွေစာရင်း ရေးဆွဲကြသည့်အခါ စီမံကိန်းနှင့်ဘဏ္ဍာရေးဝန်ကြီးဌာနက ထုတ်ပြန်ထား သည့် လမ်းညွှန်ချမှတ်ပေးမှုများအတိုင်း ဆောင်ရွက်လျက်ရှိပါကြောင်း၊ ယခုသင်တန်းတွင် အခွန် ကောက်ခံရာ၌ လိုက်နာဆောင်ရွက်ရမည့် အချက်များ၊ စီမံကိန်းရေးဆွဲခြင်းနှင့် ဘတ်ဂျက်ရေးဆွဲ ခြင်းဆိုင်ရာ ချိတ်ဆက်မှု ခိုင်မာအားကောင်းစေရန်၊ ဘတ်ဂျက် အကောင်အထည်ဖော်ရာတွင် စွမ်းဆောင်ရည်ပြည့်ဝပြီး ထိရောက်မှုရှိသည့် အသုံးစရိတ်များ သုံးစွဲနိုင်စေရန်၊ ရသုံးခန့်မှန်းခြေငွေ စာရင်းကို လျာထားချက်အတိုင်း ပြည့်ဝစွာ အကောင်အထည်ဖော်နိုင်စေရန်၊ စီမံကိန်း အ‌ကောင် အထည်ဖော်မှု၊ ဘတ်ဂျက်အကောင်အထည်ဖော်မှု အစီရင်ခံစာများ စနစ်တကျ တင်ပြနိုင်စေရန် နှင့် စနစ်တကျ စာရင်းစစ်ဆေး ခံယူနိုင်စေရန်၊ ကြွေးမြီစီမံခန့်ခွဲမှု၊ ငွေသားစီမံခန့်ခွဲမှုနှင့် အစိုးရ ပစ္စည်းဝယ်ယူရေး စသည်တို့ကို ပို့ချဆွေးနွေးခဲ့ပါကြောင်း၊ ယခု မွမ်းမံသင်တန်းမှာ ပို့ချခဲ့တဲ့ ဘာသာရပ်တွေသည် လက်တွေ့လုပ်ငန်းနယ်ပယ်မှာ များစွာအထောက်အကူပြုလိမ့်မယ်လို့ ယုံကြည်မျှော်လင့်ပါကြောင်း၊ ထို့ပြင် ယခုသင်တန်းတွင် “End-Course Panel Discussion” ကို ထည့်သွင်းဆောင်ရွက်ခဲ့ပြီး ဒုတိယဝန်ကြီးများက ဦးဆောင်၍ “မြန်မာနိုင်ငံ၏ ပြည်သူ့ဘဏ္ဍာရေး စီမံခန့်ခွဲမှု ဖွံ့ဖြိုးတိုးတက်စေရန် ဆောင်ရွက်သင့်သည့်အချက်များ” ခေါင်းစဉ်ဖြင့် “စီမံကိန်း ဆိုင်ရာ ရှုတောင့်နှင့် ဘဏ္ဍာရေးဆိုင်ရာ ရှုတောင့်” တို့မှ ချဉ်းကပ် သုံးသပ်၍ ဆွေးနွေးခဲ့ကြသဖြင့် သင်တန်းသား အရာရှိကြီးများ အနေဖြင့်လည်း လေ့လာမှတ်သားစရာများ ရရှိလိမ့်မယ်လို့ မျှော်လင့်ပြီး လက်တွေ့ပြန်လည်အသုံးချနိုင်ရန် ကြိုးစားကြစေလိုပါကြောင်းနှင့် နိုင်ငံတော်၏ စီးပွားရေး ဖွံ့ဖြိုးတိုးတက်ရန် စွမ်းရည်ပြည့်ဝတဲ့ ပြည်သူ့ဘဏ္ဍာရေးစီမံခန့်ခွဲမှု ဆောင်ရွက်ချက် များဖြင့် ထိထိရောက်ရောက် ပံ့ပိုးဆောင်ရွက်ပေးကြရန် ဆွေးနွေးပြောကြားခဲ့ပါသည်။ 
ဆက်လက်၍ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီးက သင်တန်းသား/သူ များကိုယ်စား သင်တန်းသား (၁) ဦးအား သင်တန်းဆင်းလက်မှတ်များ ပေးအပ်သည်။ ပြည်သူ့ ဘဏ္ဍာရေးစီမံခန့်ခွဲမှု သင်တန်းကျောင်းတွင် ပြည်သူ့ဘဏ္ဍာရေးစီမံခန့်ခွဲမှုဆိုင်ရာ အခြေခံသင်တန်း များ၊ ကာလတိုအထူးသင်တန်းများ၊ အလုပ်ရုံဆွေးနွေးပွဲများ၊ ဘာသာရပ်ဆိုင်ရာ နှီးနှောဖလှယ်ပွဲ များ စဉ်ဆက်မပြတ် ဖွင့်လှစ် ဆောင်ရွက်ပေးလျက်ရှိသည်။ ယခု ဖွင့်လှစ်သည့် အထူးမွမ်းမံ သင်တန်းသို့ ဝန်ကြီးဌာန အသီးသီးမှ ညွှန်ကြားရေးမှူးအဆင့် သင်တန်းသား/သူ (၃၆) ဦး တက်ရောက်ခဲ့ပြီး သင်တန်းကာလမှာ ရက်သတ္တပတ် (၄) ပတ်ကြာမြင့်ခဲ့ကြောင်း သိရသည်။